Congress asentenshitsü atema Priyanka anioktsüla: Amethi

Amethi, April 22 (Agencies): Brihostibarnü Congress tatong Tir, Rahul Gandhi-i pa adokba Lok Sabha constituency, Amethi (Uttar Pradesh) nung senden ka ayongzüka liasü, iba mapang nung nüburtemi pa dang state nung tanga tesemtema semdangtsüla, aser sangküm assembly election metenzükdang pa aianu, Priyanka Gandhi yimtenren nung ajemokdaktsütsüla ta mepishiogo, ta Indian Express osang ajanga metetdaktsü.

Kasa osang ajanga ashiba agi, Ghoraha nung alirtemi Rahul dang “Kanga tongtibang state ka nung Congress party asentenshitsü atema Priyanka Gandhi yimtenren nung anioktsüla,” ta shiogo.

News18 osang ajanga ashiba agi, Gandhi-i osanbenertem paitoktsü meranga tasüngdangbatem melangzü. Item tasüngdangba rongnung kidanger state, Uttarakhand nung Centre sorkari Tir yimsüsüba benoka aliba High Court-i agientsüba onük dak sentakba nunga tasüngdangbatem liasü.

Anogo ananü Amethi semdangtsü atema Bodhbarnü Rahul Gandhi par parliamentary constituency tonga arua liasü. Pa tonga arudang party züngsemtemi pa Fursatganj airstrip nung agizük. Iba sülen Gandhi district Congress Tir, Yogendra Misra’er kidangi anir oa nija senden ka amen, ta pa atema jembitsür, Chandrakant Dubey-i metetdaktsü.

India nunger nüjiso anguba sülen Congress-i Uttar Pradesh ya küm aika yimsü süa aruogo, ajisüaka tesüiba küm 20 nung Congress jenjang mejungi küma SP aser BSP ama regional party tem kanga tashi itta kumogo.

2014 Lok Sabha election nung BJP-i UP nung takok tulu ngua liasü, aser maneni 2017 assembly election nunga parnoki kasa takok angutsü imladar.