Dimapur nung ‘VBS Directors & Teachers Training’ agir

Dimapur, April 22 (TYO) : April 22, 2016 nungi tenzüka anogo ananü atema VBS Ministries, Bangalore ajanga Dimapur nung VBS Directors & Teachers training sentong ka ayongzüka agir.
Iba sentong ya Nagaland aser temeket nung aliba arogotem asoshi lir aser Elim Hall, Dimapur Ao Baptist Arogo nung agir.
Iba sentong nung shisalen sayurtemji Bangalore nungi VBS Ministries National Director, Rev. Noel Prabhuraj aser VBS Ministries Training Co-ordinator, Kiran Isaac na lir.
Tanep DABA Sannüker, Rev. N Tzüdir ajanga tekülem mapang agia iba sentong tenzük aser iba sülen taküm VBS omen nung ajemdaker shisalen sayuretemi VBS agiyim aser tanga tesayuba balala agüja liasü aser asünga tenatisa tesayuba balala agütsü.
Iba sentong nung Dimapur kübok Chumudekima, Purana Bazar, Diphupar, Kashiram, Chumudekima (A), aser Indisen nung aliba arogotem nungi dang masü saka Wokha, Tuensang, Phek aser Jalukie nungia CEM Director temi Sunday School tesayurtem parnok 30 tashi kanga dang temoatsü ngua dendar.
Iba sentong nung DABA Christian Education Ministry Director, Kr. R. Asenla Jamir-i anir tesayurtemi kentenba aser timsür mapa nung yariteper.