Oshi oben indang tangatetba kar yamai agütsür

~  R. Imkong Lkr, 4th Mile Diphubar : Dimapur.

Tanü asen Ao oshi nung temelenshi tajungba akümtsü atema tezülur aikati kanga meranga mapang endok mesasai pei shisatsü tajungba agi züluba, angudang alima tejakleni aoba sayur. Item amala zülurtemdang kanga pelaba metetdaktsür aser Tsüngrem tenüng sangaa alidang yangi ano o semlok kar zülusemtsür.
Kechiyong tetenzük nung o liasü, aser o Tsüngrem den liasü, aser o Tsüngrem liasü. Iba o ya osangtajung Yohani züluba tasen Lai nung zülua angur. Anungji o yagi oshi aküm aser oshi jagi nisungtem sentaktepa taküm lipa-liyonga aru. Anungji kodangsa oshiji tera meshidaki züludir nisungtem tsüngda mangatettep adokdaktsür, aser mangatettep ajanga yimjung raksar aser alimaji tejakleni aotsü melena teraksa jenti adokdaktsür.
Yamaji melenshitsü atema nia kü tangatetba kar yamai agutsüdanger, junger ta bilemra asenok Aor ajak asoshi temoatsü asütsü ta yimlaseta zülur.
1.    Inti tetezü lokti tuluba senden, tatishitsü agi Khristmas Inti, iba anogo nung lokti ajunga adenshia pelatepa chiyongba mapang alir. Ano lokti senden adenshia yimer yimsanger ajak o jembishinü akar. Anungji iba ojang Inti melena Renti (saka Rendi ta masü) ta amshi tajungba asütsü. Kechiyong Inti jagi tetezü kanga jungabo magütsür, saka kodang renti ta südir telok loktiren mesüra süngjenren ta shinerba ta angatetdi. Anungji tang nungibo Khristmas Inti ta masü Khristma Renti mesüra Moatsü Renti ta amshi tajungba asütsü ta shidanger.
2.    Senden (Meeting) ya asenok yimtsüng shia senden aiben tang amener, iba mapang tezüluba (Secretary) ajanga metetpela (Information) agütsür aser ashir, shibasa senden (meeting) nung medenteter takang (fine) tulu alitsü ta sangdonger. Iba ama English aser asen oshi mera taket item ya meyoktepa zülua angur aser tejembia jembir. Anungji arung asenokbo Aor senden akatsü metetpladang sandong tejangja zülur asen Ao oshi mejameja jembidi aser züludi ta ayongzüker.
3.    An tokdangba ta temeshi Lai nung zülua angur. Iba ojang ya temeshi Lai meyiperi aibelenba lir. Kodang an tokdangba ta südir, An tetezü English oshi nung (Female of domestic fowl) ta shia angur. Anungji Anji metokdangtsüla. Saka Am tokdangba ta amshi nung tajungba asütsü. Iba Am ya arem nung mesüra atsüh nung meia angur aser iba yagi chiyongtsü chitem amala atemer aser arasentsürtemi (Witches) iba Am yagi atakatema (sarasademer) shisar aser idangji iba Am shisaba yagi pasasa temsong tilala küma medoker, ibaji arasentsürlai jungjunga reprangdanger tia (Luck) ajung asü majung shiteter.
Yamaji asen tebou-tetsü Longtrok ken nung yamai atener – Ongangla tangi yimer tia asüngdangi aoba jembia aru. Onganglateangjagi Am-tok amsü oani tsusentzüpu külemangta ta atenba otsü jembia aru.
4.    Aku, Ako, Ago mesüra Akhu ta amshiba ya tetezü teratet kangabo tejangja ka mekai amshi ta bilemer. Iba Aku, Ako, Ago mesüra Akhu ya mapang amshiba atemasa jembir. Tatishitsü agi 4 paji mesüra 4 paji tesadang Aku ta jembir. Aser iba paji ta asüba jia Hindi mesüra Assamese oshi amshirba dang. Anungji asenokbo tang nung 4 paji ta masü 4 mapang ta asen Ao oshi nung meja-meja amshidi arungma.
Tatishitsü (Eg.) (1) Yamai amshitsü ajatsü yimya tajung süpati arung 4 AM (Short form) 4 A.M (Long form) Anepdang Mapang, iba ya aonung 12 mapang süir kelen anepdang nung anüngdang 12 mapang tashi alitsü.
Tatishitsü (Eg.) (2) 4 Ag.M (Short form) 4 Ag.M (Long form) Aonung tsütsü Mapang. Iba ya anüngdang 12 süir külen nungi aonung 12 mapang tashi alitsü. Item jayajako ajak ya mapang atemasa amshirba lir.
Taoba mapang 19 to 20 Centuries nung yimtsüng shia nung mapang metettsü mechi nung süng tulu talang ana angentepa yur iba talak nungji yinpak tenari tuluka sentaka yursa Deoparnü anepdang ken aonung ken ta temoatsü sentep mapang aser CYE sentep mapang nung Chowidarbaisa yinji atem mesüra Aku, Ago. Ibajigi 4 Aku, 9 Ako, 10 Aku tasa jembia zülua aru. Saka ano School nungbo subject shia tesayur (teachers) melenteptsü mapang yin atemer mesüra Akhur. Iba dak alaka tanga nungbo Aku mesüra Ago ya amshitsüsa madoker. Kodangsa yimdong nung mesüra aintsüenlen lenmang nung senzüdang mapang metetnüdir aseni azüka aliba Watch mesüra Mobile Phone nungtu mapang repranger, ano talisa arem Min mesüra alu nung alidang mapang metetnüra kusaji asenoki Mobile Phone aser Watchji repranger aser mapangji repranga mapatem inyaker. Yamaji iba Mobile Phone mesüra Watch nungji mangur mesüra matemer, saka mapangtem süia aoba angur. Anungji tang nungibo 6 Ago mesüra 8 Ago ta mejembie 6 anüngdang mapang 8 aonung mapang ta amshiba tajungba asütsü.
Yamaji tang nungibo Sendong (Programme) ajak nung Aku, Ago ta mamshie 6 sangwa mapang mesura 6 amang/aonung mapang ta amshitsü ayongzüker. Ano temetet-tsükaji Aku, Ago ya mapang indang amshir, saka temalen shia aliba ama Watch mesüra Mobile Phone nung mapang maku ser mapangtem süia jaja aor. Anungji tang nungibo 6 Ago, Aku ta mamshili ta iba ocet yagi ayongzüker.
5.    Asen Ao oshi-oben nung tetezü aser Olasü nung tera junga mangateti Ojang kar amshia aruba temulung masüba tamalen zulur aikati ashishitepa aruogo, iba Ojang Sumzük tu ano khen jangjashidi ta ser zülutsür anungji mejashie arema khen atadaktsüner. Iba Sumzük ojang ya kechi nung apet aser kechi nung mapet jembiyonga odi arung, kodang kidang-kibong nung asü ama mesüra tanga anempong kar atalokdir asen tetsü-tebou mapang nung anempong ya kangasa atakarua monga aru, anungji iba mapang temer kelen kinunger ajak Alu semzüki-sa ao. Aser iba semzüki aoba yasa benshia aru, idangji par kinunger ajak Alu semzüki An tepung tuluka bener oagi parnok ajak tzüchikodaka ajak merükteter külen chiyongtepa kazürsa adok, iba dangji semzüki aoba ta jembia aru.
Saka kodang yimtsüng ka nung tenlaki tuluka yanglu ABAM Secretary-ba mesüra tangar tongtipang nisung kati arua sarasadema tenlakiji meshiteta lapokdir iba dangji lapoktsür ta amshir saka tenlakiji mesemzüktsür ta angatetdi. Ano kodang lenmang tasen ka (Sanction) aika Department-i sutsür ibaji renemer kelen lenmangji tanü nungi senzütsü melar ta shia Minister mesüra Director/Engineer kati lapoktsüdir iba dangji Lapoktsür ta jembir, saka semzüktsür ta shira kang nangabo magizüker. Au ni, iba sumzüktsüba-tesem ka nungbo tetezüji shidak tang, saka tangatsü atema tanü asüng lanurtemi kanga nangabo magir, anungji tila tulu ajaki kangabo mashi shie jempiba aser zülubaji tajungba ta shidanger.
6.    Tir Yimyim adok 175 Dated 13th April ‘2016 Page-2 nung Oshi aser zülumen nung meshisadangi amshiba Ojang teraksa aluba shisadangdi ta ser A.I. Maong Aier Retd G/T Alongmen ward Mkg-i Ao oshi nung temelenshitsü aliba aika kanga junga ratet-ta rasaa züluba angudang kanga pelaa jangratema züngogo. Iba temelenshiyim tajungba züluba yagi asen Ao oshi ya tajungba takarba kümdakja oshi tejakleni aoba sayur. Saka pei züluba tom ka nung temelenshitsü ka ajitetba shiner, aser ya tarutsü mapang nung melenshi nung ajungtsü. Pai ashir Mongseneri Merang nung tapuk aliba agi Merangpong ta ajar ta shiogo. Aser Junglieri prang ta asüba agi Prangpong ta ajar ta shia angur. Saka Merangpong ta ajabaaa tetezü ojang ya Suyim (Ungma) oshi nunga mezüngyongi amshia aru aser Suyim (Ungmajia) Junglir-sa asü nung (Pai) Mongsener kechai Merangpong ta ajar ta züluba ya melenshi nung ajungtsü ta shisemer.