NSCN/GPRN-i Assam nung tax saruba indang osang jangjashitsür

Dimapur, April 22 (TYO): Assam Tribune nung Nagaland media kar nung NSCN-i Assam nung tax saruba indang osang sangdongba atema MIP-NSCN/GPRN-i sangdong ka nung iba osang jangjashitsüogo.
Assam Tribune nung adokba osang nung Ministry of Home Affairs (MHA), Government of India nungi ketdangser ka indang tenüng shia mali, anungji iba osangji tejangja ta meshitettsü saka ajaki meteta alitsü atema onük kar metetdaktsür, ta sangdong nungsa shia lir.
NSCN-i Naga nunger arrtsü aser kidanger indang arrtsü atema terataba kecha mali. British nunger yimsüsüba mapang arrtsü tiyazü ladangba aser India nüjiso anguba sülen Naga nunger tetsü-tebou mapang nungi ali rakzükba inyakyimji kodanga magizüktsü, ta MIP-NSCN/GPRN-i metetdaktsü.
Naga nunger lushi karbo India-i tashiyim agi rakzüka parnok ketdangsüba kübok anioka alitsü akok saka Naga nunger lushi ajak nung NCSN-i ketdangsütsü tashi lir aser bendangertemi Naga nunger madak yimsü asübaji NSCN-i magizüker, ta parnokisa ashi.
Cease Fire Agreement ji telok ana tsüngda angatettepa agiba lir, anungji telok kati parnok mulungka nung tetuyuba agütsütsü nüngdak madoker. Cease Fire senden amenba den tax saruba tesentaktep kecha mali. NSCN-i India sorkar dang Naga nunger dang nung tax temeshi ta ashitsü temeten mali aser kasaji India sorkaria meshitettsü, ta MIP sangdong nungsa metetdaktsü.
NSCN aser India sorkar tsüngda yimjung olemtepji telok anaprong kasa ta tangatetba nung inyaka aotsü mulunga tenzük. India Linük Temzüng jagi NSCN malenbanger kechiyong Naga nunger onok sasa ketdangsütsü atema ozüngtem lir. Anungji, linük temzüng-ozüngtemi Cease Fire Ground Rules nung mulunga bangzüngtepba teloktem malenbanger, ta NSCN/GPRN-isa ashi.
Naga linükji Naga nunger asoshi lir, anungji Naga nungeri dang tax saruba atema telemtetba agitsü aser NSCN-i Naga nunger asoshi noktaker.
Assam sorkari shilem magiba ajanga India sorkar aser NSCN tsüngda yimjung olemtep maparen tetsükdaktsü ajurur ta sangdongba osangji tiyazü kechiyong Assam aser Manipur sorkartemi memulungaka India sorkar aser NSCN tsüngda yimjung olemtep kanga junga liyonga arudar, ta MIP-NSCN/GPRN-isa jangjashitsü.