England tsür ken zülur aser kentener Adele

England tsür ken zülur aser kentener Adele (shitakba tenüng Adele Laurie Blue Adkins) May 5, 1988 küm aso. La Performing Arts & Technology, BRIT School nungi 2006 küm graduate asü.
Lai 2007 küm Brit “Critics’ Choice” sempet  angu aser  2008 küm BBC Sound poll nung takok angu.
La arishi küm 19 asüdang 2008 küm mezüngbuba lai atenba kensep ka adoka alima ajunga nung prokshia takok tulu angu.
Lai 2009 küm 51 Buba Annual Grammy sempet agütsüba sentong nung ‘Best New Artist aser Best Female Pop Vocal Performance’ sempet agizük
2011 küm tetenzüklen Adele arishi küm 21 asüdang lai atenba studio kensep tanabuba yanglu aser iba kensep nungi sempet aika agizüka liasü. Item sempettemji: Album of the Year, Brit Awards ana den British Album of the Year,  aser American Music Awards asem anguba den UK nung kensep junga ayokba rongnung pezübuba süa iba kensepji ayok. UK nung 1985 küm nungi mapang talangka kensep sapua malitepba sülen la kensep sapua temaba jenjang nung liasü aser alima ajunga nung iba kensep ayokba nungi sen million 31 yokzük aser iba den külemi Guinness Book of World Records nunga otsü tasen ka yanglu.
2012 küm lai kensep “Skyfall” saya. Iba kensepji lai James Bond film atema zülua yanglu aser iba ken ajanga Academy Award,  Grammy Award,  aser Best Original Song  atema Golden Globe Award  angu.
Küm asem tashi anizüngzüka lir külen lai arishi küm 25 asüdang 2015 küm tasembuba  kensep ka saya. Iba kensep jagi küm shia timtiba ayokba otsü tasen yanglu aser UK o US na nung hopta asem tashi kensep timtiba ayokbaji la kensepji liasü.
April 20, 2016 nü Sunday Times Rich List ajanga Britain nung tetsür kentener takartibaji Adele lir ta sangdongogo.
Wt. Penny Adkins aser Wb. Mark Evans na jala Adele Laurie Blue Adkins (Adele) May 5, 1988 küm Tottenham, London nung aso. La küm ana asüdang tebu Evan-i la tetsü den doktsür oadok. Adele küm pezü asudang nungi lai ken atentsü jangraa liasü. La tain akümdang, lai kaket azüngba dang nungibo ken atentsü-ang jangra aküm. Tatemsa la küm 6 asüdang ‘Roald Dahl’s Matilda’ kaket azüng.
La küm teku (9) asüdang 1997 küm tetsü dena Furniture mapa den adult-learning activities mapatem inyaka Brighton, south coast England nung ali.
Küm ana sülen 1999 küm tanaben Adele o tetsü na London-i meyipa ao. Mezüngbo tena Brixton nung ali, iba sülen  South London, West Norwood  district kübok ali. Idangji Adele-i kensep mezüngbuba “Hometown Glory” 2004 küm ken zülua adok.