Latur nung tzü mangur atema Riteish Deshmukh-i sen lakh 25 tenla

Mumbai, April 23, 2016 : Bollywood film actor Riteish Deshmukh-i tawa pa tasoli, Latur semdangba mapang yangji alir tzü mangu okrongertem yaritsü asoshi ‘Jalyukta Latur’ tentet nem sen lakh 25 agütsü.
Jalyukta Latur tentet ya Latur nung tzü peria bener arutsü atema inyakteptsü asoshi tentetba lir. Iba telok yagi Manjira ayong nung jana-ona intoka merükteta mesemshir iba tesem nung aliba nüburtem atema tzü agütsüdar.
Parnoki iba ayong metong kilometre 18 aser lenten metre 80 tera aroka aser ulushia onshiogo. Yamaji inyakba ajanga tzünglu tzü aika bentettettsü aser küm piyong iba jagi peritsü.
‘Jalyukta Latur’ teloki iba ayong onshia yanglushiba semdangdang “Ek Villain” nung tongti shilem agisang, Riteish Deshmukh kanga süngmang aser pai indangjisa tenla agütsütsü nangzük, ta sangdong ka ajanga metetdaktsü.
Tesem semdanger kati Riteish dang na-a iba tentet nung adentsü asü ta asüngdangdang pai, ni yaritsü mulunga lir, ta kecha marendaki langzü.