BJP nung madenba party tem longjemdaktsütsü: Nitish

Patna, April 23 (Agencies): Tanü Bihar Chief Minister, Nitish Kumar-i, saffron party BJP tamakok ngudaktsütsü atema BJP nung madenba party tem longjemdaktsütsü asoshi pai tayonger ka ama inyaktsü, ta metetdaktsü.
“Menden ka atema kü tenüng mesangdongtsü ajisüaka nisung ka Ato kilonser akumtsü atema tiaja lira kenü anogobo paji Ato kilonser akumtsü,” ta Kumar-i ashi.
Nitish Kumar JD(U) Tir tasenba shimba JD(U) national council-i agizüka liasü, aser iba senden nung jembidang pai, “Ni menden ka marshitsü. Ni shinüba ajak agi- asenok ajak longjemtsüla (BJP anema). Nisungtem dang longjemtsüla ta ashibaji ozüng alema asü (?)” ta asüngdang.
Pai ashiba agi, “Lenir asütsü onükji mapangi dang ashitsü. Nisung ka Ato kilonser asütsü tiaja lira, kenü anogobo paji ato kilonser akumtsü. Aser nisung kati pa Ato kiolonser akumtsü ta sangdongra pa mangdangji kodanga tejang matanger.”
“Tamasa asenok ajak longjemtsüla. Ajaki tenlaa inyaktsüla. Lalu Prasad künati langka atema metenlara Secular Alliance teloktep mekümtetla,” ta pai ashi.
Anogo ishika tejaklen Bihar chief minister, Kumar-i linük nung RSS anema party tem longjemtsüla aser 2019 Lok Sabha election nung BJP tamakok ngudaktsütsü atema linük jenjang nunga Bihar assembly election nung inyakba ama inyaktsüla, ta jembia liasü.
JD(U) Tir tasenba atema Tir menden nungi anisüngzüksang, Sharad Yadav-i Kumar tenüng benoka sülen linük tesem balala nungi party nung inyaker nisung 1,000-ia ibaji melunga agizük.
April 10 nü New Delhi nung party national executive committee senden alidang party Tir atema Kumar shima liasü, aser pa shimbaji national council-ia tanü agizükogo.
BJP-i aniba sorkari nangzükbatem mataloktsü aser tamangba yimsü nung ajemdaker lokti nung telemsa adokdaktsür ta aija Kumar-i, “Centre nung BJP nung madenba party tem longjemra, 2019 Lok Sabha election nung BJP-i tamakok angutsü,” ta ashi.
Kumar-isa, “Onoki Bihar nung Secular teloktep yangluba ajanga Bihar Assembly election nung BJP tamakok ngudaktsü aser kasa inyakyim ajanga Lok Sabha election nunga BJP tamakok ngudaktsütsü,” ta ashi.
Tanü JD(U) national council senden nung Sharad Yadav, K C Tyagi, Bashishtha Narayan Singh aser party MLA tem den MP tem iba den külemi socialist  nungia züngsemtem dena liasü.