US: Ohio nung kibong ka nungi züngsem 8 tashi kaset

Ohio, April 23 (Agencies): US Midwest tsütsülen, Ohio nung anogo 4 tain kinü den mejanga aliba tetsü ka densema, kibong ka nungi nisung 8 tashi khen nung injang agi kaseta lendong atalokdaktsüba sülen police-i lendong atalokdaktsür ta temulung melemi bilemba nisungtem bushitsü tenzüka lir.
Cincinnati nungi anüdoklen tsütsüleni kilometer 130 shi pilar, Appalachian Mountain anasa, Pike County nung yasüng, Hokolbar aonung atalokba lendong nung nisung tain 7 aser arishi küm 16 tain asangur ka tekolak nung injang kalokja kasetba osang jangjaogo.
“Tan lendong nung kinü tanur den külemi, ita 6 tain tanur ka aser arishi küm 3 tain tanur ka densema, ajak agi tila tanur 3 tashi taküm kümzüka lir,” ta Pike County Sheriff, Charles Reader-ia osang jangjashitsü.
“Tan asür tasümang kar yipden nung liasü aser ibaji ajanga parnok mejanga alidang injang agi kasetba kuli angu,” ta shia, tan amakertemi mapang jilia terenemshiba agir Rhoden kibongji kasetba osang bushitetba olen ka police-ia metetdaktsü.
“Tan asür rong nung nisung ka danga peisasa soseta asüba kuli nguteta mali,” ta shia, tanüngba Rhoden kibong züngsemtemi kümdangshia alitsü asoshi ketdangsertemi metetdaktsüogo.
“Tan lendong atalokdaktsür mesüra atalokdaktsürtem pua parnok ozüngi melaba ama merenshitsü atema nungdakba bushisüngdang agitsü tenzükogo,” ta Republican yimtenren telok nungi US Tir menden asoshi candidate ama toktepsang, Ohio Governor, John Kashich-ia metetaktsüogo.