Tsüngrem yimli

~  K. Imliyanger Jamir, Eralibill Dimapur

Tsüngrem yimli, tenük agi manguba yimli. Kongsa Yisu dak amangertem lir, idakji Tsüngrem yimli arua lir. Yisui nütsüngtem dang ashi, “Nenok sensakertem tepelatsü, kechiaser Tsüngrem yimli nenok meyong. (Lk. 6:20). Tsüngrem yimliji  osang tajung, Tsüngrem yimli sayutsüngitsü Yisui nütsüngtem yok. Aser pai teranaji külemi jatep aser tashitaktem anebtsütsü aser temenen tanelatem ajak aridoktsü parnok nem tashi ain agütsü. Aser Tsüngrem yimli sayutsüngitsü aser shirangertem anebtsütsü pai parnok yok. (Lk 9:1-2)
Tsüngrem yimliji terakteper meyong: “Yohan baptitsüba anogo nungi tang tonga kotak yimliji rakteper, aser tesashirtemi aji rakzüka agir. (Mt 11:12) Kenü Yisui Pilate chuba dang ashi, kü yimlibo iba alima nungi masü ta pai anünglen teyua ashi. Ano Yisu Pilate chuba tsüngdang noktakdang, Yisui Pilate dang ashi, “Kü chuba yimli iba lima meyong masü………………saka kü yimlibo iba lima nungi masü”. (Yhn 18:36) kechiaser Tsüngrem yimliji kotak nung, aser iba alima nunga shiri techir dang amanger parnok dak amenloker.
Tematiba temeshipurtemi Tsüngrem yimliji agizüktsü aser teti asoshi parnoki yimliji agizüktsü, oda teti asoshi parnoki yimliji agizüktsü, oda teti tatem makai. (Dan 7:18) Yisui putiunger aser nübur tamburtem dang ashi, “Atangji ni nenok dang ashir, alimelen sarurtem aser nüktapangtartem nenok dang tama Tsüngrem yimli-i air. Kechiaser Yohani temeshiba lenmang nung nenok dangi aru, aser nenoki pa dang mamang; aser aji nenok nguaka, tesülen nenok sasa temulung memeyip aser mamang”. (Mt. 21:31-32)
Tsüngem yimli bushibaji temenen toktsür Yisu sülen anidakba. Temulung meyipa Yisu dangi aoba. Tanaben asoba taküm. Tsüngrem yimli tanelar yimli. “Temeshiba yimli”. Tsüngrem yimliji tamangertem mulungjang nung amenloker, anungji iba yimliji tenük agi angutsü makok, aser Tsüngrem yimliji ochishir jennokdak.
Tsüngrem yimliji koma arur: Tsüngrem ain ajanga asenoki temenen tanelatem aridokra; Tsüngrem yimliji asenok dangi aruogo. Farisitemi Yisu dang asüngdang; Tsüngrem yimliji kodang arutsü ? Yisui parnok dang langzü, “Tsüngrem yimliji penzütsüsa temaitsütem agi marur”. Mesüra shingaia yamai mashir, yangi ajiang mesüra oagi ajiang, kechiaser ajiang Tsüngrem yimli nenok rongnung lir”. (Lk 17:20-21) Saka Yihuda nunger lenirtemi Tsüngrem yimliji kodang arutsü ta yongya liasü. Messiah arutsü aser pai alima nung yimli tasen ka amenloktsü, idangji Rom nunger yimsüsüba küpok parnok malitsü, aser Israel lima nung yimliji amenloktsü aser parnok nüchiso angutsü ta bilem. Tanabuba nung, Yisu yimsü agi parnok tetsü tebou yimsüji amokpangtsü ta arendaka bilem. Anungji Rome chuba Kaisar dangi Pilate chubai osang yokba shidi nung   yamai zülua lir, “Ni ashir, asen tetsü tebou yimsüji Yisu yimsü agi amokpangtsü ama; aser anojungi asen yimsü samaa akümtsüsa Yihuda nungeri niji nok-o-nü ka ama agitsü meranger; saka tatemlen koma asütsü aji ni aremzüka, iba tamaren mapa atema, ni iba timtem agir.
Tsüngrem yimliji kodanga mesamaba yimli: “kechiyong pa taküm Tsüngrem teti marakzüi aliba aser pa yimsüsüba teti tatem tonga alitsü.” (Dan 6:24) “Aser nüurtem, kintem aser oshi ajaki pa tenzüktsü pa nem yimsüsütsü, aser sentsüwangshi, aser chuba yimli agütsü, pa yimsüsübaji teti tatem maka, kodanga süitema maotsü, aser pa yimliji samatsü makok.” (Dan 7:14) saka temmmatiba temeshi purtemi yimliji agizüktsü, oda teti tatem makai. (Dan 7:18) ….. pa yimli teti aliba yimli lir, aser pa yimsüsüba putusa putu lir. (Dan 4:3)
Pa yimli koma alitsü? “Pa yimliji tzüyim nungi tzüyim tashi, aser ayong nungi ali tatem tashi alitsü. (Zek 9:10) Anungji Yisui ashi, “saka tamasa nenoki Tsüngrem yimli aser pa temeshiba bushiang…. (Mt 6:33) kechiaser kong ana mesüra asem kü tenüng nung longjema lir, yangji ni parnok rongnung lir. (Mt 18:20).
Asenok rongnung asenoki temenen tanela aridokra, ano asenok rongnung asenoki Yisu tenüng nung mojing aridokra, aser shirangertem anebtsüra, Tsüngrem yimliji asenok rongnung lir. Ajemaluba aser tila akümbaji Tsüngrem yimli-i aiba temaitsü lir, “shir ajemalurtem lir parnok tepelatsü, kechiaser parnoki alima senmang amangtsü.” (Mt 5:5) Ni tanela nung  anünga lir ta shiri metet parnok tepelatsü, kechiaser kotak yimli parnok meyong. (Mt 5:3)
Nai Tsüngrem yimli aser pa temeshiba bushitetra, ne tanela anisüngzük angutsü. Menen khuret abener ajak Yisui ajar, kechiba tanela anisüngzük agütsütsü asoshi, shiri pa yimli aser pa temeshiba bushiteter parnok nem ajak inloktsür. Saka taküm tanelaji am tasa agi taküm mali, saka Tsüngrem bang nungi adokba o shia agi taküm alir.
Kibuba taküm agütsür, süra asen ajak pai magütsüli ma? Alima osettem dang mebushi-i pa yimli bushitsüla. Pa yimli bushitetra tepela tesünep aser taremzük adokdaktsür, anungji asen teimlaji mesamai alir. Tsüngrem yimli, ibai terakteper meyong. Yohan baptitsüba anogo nungi tanü tashi rakteper. Kotak yimli jagi aitsü rakteper, shibai asen kibuba Yisu khrista dak amanger pai iba yimliji rakzüka agir. Temenen toktsür Yisu sülen anidakertemi kotak yimliji rakzüker. Shirsa tematiba temeshi pur den kasa aküm, parnoki teti asoshi yimliji agitsü temsüa akümer. Tsüngrem yimli-i aitsü atema sen menüngdaker, ibai alitsüa makok ano ayoktsüa makok. Ibai tamang agi Yisu den jaja nung rakzüka agir. Ibai tebushir shia angur. Tulur, tilar, takar sensaker kecha telemsa mali, tesashirtemi rakzüka agir. Yisui ashi, “Tsüngrem yimli nenok rongnung lir. Temeshi purtem mulungjang nung Tsüngrem yimliji teti asoshi amenloker.
Tsüngrem yimliji khen atema masü, saka teti asoshi agizüker. Iba yimliji temeshipurtemi agizüker. Tsüngrem yimliji tamang agi agizüker. Tsüngrem yimliji ochishir jenokdak. Kodangsa Tsüngrem tanelai asenok dak mapa inyakdir, Tsüngrem yimliji asenok dangi aruogo. Tsüngrem yimliji kodanga mesamaba yimli. Tsüngrem yimli nung Yisui teti tatem makai yimsü asütsü.