Linük 171-i Paris Climate Agreement nung sign asü

United Nations, April 23 (Agencies): United Nations nung linük 170 den timba den külemi India-ia Paris climate agreement nung sign süogo. Hokolbarnü 46 buba Earth Day anogo nung iba tamaitsü aketba tenangzüktep agi.
UN General Assembly hall nung amungdang UN Secretary-General, Ban Ki-moon-i len ania agiba sentong nung Environment Minister, Prakash Javadekar-i India tenüng nung sign asü.
“Iba ya alima putiotsü nung tongtibang mapang ka lir. Tanü nenoki tarutsü atema tezüngzüktepba tasen ka nung sign asür,” ta Ban Ki-moon-i ashi.
Alima kanga tatsük küma aoba, sea level talila akümba aser rülung tulu alibatem yimsa aoba tensa ka ajuruba ajanga Paris Agreement agitsüsa aküm aser iba tenangzüktep agiba nung linük ajaki nangzükba ama mapa agi inyaktsü bangjemtep.
Iba tenangzüktep ya 2100 küm tashi nung global warming ya 2 degrees Celsius (3.6 degrees F) ajema kümdaktsütsü alizüng yur nangzükteper.