‘Khongjom Day’ nung Tir Pranab-i tetushi agütsü

Imphal, April 23 (Agencies): 1891 küm Manipur nung Khongjom tongbang dak sentakba nung tanü Honibarnü Tir, Pranab Mukherjee-i, Manipur nunger sepaitem, shirnoki British sepaitem anema tongbang raraa liasü, parnoki asen tarutsü atema tanü taküm bendanga agütsü, ta ashi.
125buba ‘Khongjam Day’ benjungmung sentong nung tongti tesemdanger, Tir Pranab-i  War Memorial Monument-cum-Tourist Complex lapoktsüdang iba oji jembia liasü.
Honibar nikongdang 2:20 ako meta Tir, Pranab Imphal nung Tulihal International Airport tonga aruba sülen helicopter ajanga orr Thoubal district nung tawa yangluba Kodompokpi helipad nung anenzük. Iba sülen pa Khongjam nungi kilometer 1.5 pila aliba Kheba hillock-i oa War Memorial Monument-cum-Tourist Complex lapoktsü.

English East India Company-i India linük par tashi küboki aitdaktsüba puti otsü lemsapa den külemi Manipur nung Khongjam tongbang tetshia Pranab-i, “Puti otsü metetertemi ashiba agi, 1757 küm Plassy tongbang nungi tenzükba sülen iba tongbang ya tatembangbuba liasü,” ta metetdaktsü.

Kümshia April 23 nü Manipur sorkari ‘Khongjom Day’ munga pei tetsü tasoli atema taküm bendanga agütsür Manipur sepaitem nem tetushi agüja arur.

British nunger sepaitem anema rarar Manipur nunger tashutait sepaitem nem akhüm tetushia agüja ta shia Tir, Mukherjee-i, “Mapang tatsü ka atema, Manipur shilem kabo  INA-i nüjiso agütsü aser Moreh (Chandel district) anasa tesem ka nung Netaji Subash Chandra Bose-i wako (India wako) salatsü,” ta ashi.

Tanü nikongdang Manipur Angh, V Shanmuganathan, Chief Minister, O Ibobi Singh den pa deputy, Gaikhangam aser sokrar tongti ketdangsertemi Tir agizüka liasü.

2014 küm nunga Tir Pranab-i Imphal semdanga Manipur University 14buba Convocation nung dena liasü.