India-i judiciary tashitait nüngdaker: TS Thakur

New Delhi, April 24 (Agencies): Tanü Deobarnü Chief Justice, T.S. Thakur-i, obendangertem agi peria ketdangsüba tashi tait judiciary ka makaibo India’er rongsenkettsüng maintsü, ta metetdaktsü.
Bendangertemi yangi arua senotsü intoktsü atema aser ‘Make In India’ mapatong takok angutsü atema judiciary tashitait ka nüngdaker, ta pai ashi.
“Asenoki jaokertemi-a (sen intoktsü atema) judicial system aser ochi obendang atema tebilemtsü akar,” ta Supreme Court tongti, Thakur-i ashi.
“Judicial system tashi itta alibaji linük terenlok den kanga tongtibangsüa sentaktepa lir,” ta paisa ashi.
Chief minister tem, High court nung chief justice tem aser Supreme Court obendangertem külem senden tetenzük sentong nung jembidang Thakur-i, ken o jenti aliba India Judiciary atema obendangertem-nütsüng ratio ji kanga majung, ta ashi.
Terenlok aliba linüktem den metemdangra India nunger obendangertem-nütsüng ratio ji tajentu kata masü, ta paisa ashi.
“Iba ya aitsüba agia meperi. Nenoki khuret ajungaji obendangertem nem magütsütsüla” ta shia Thakur-i, küm ka nung American Supreme Court nung obendanger 9 senteper ken o 81 lateter, ajisüaka Indian Supreme Court nungbo küm ka nung obendanger kati ken o 2,600 lateter, ta ashi.
“Iba atema lenmang kaji- okadak tali amenoktsüla aser nisung million shia nung obendanger tashiji 50 tashi asütsüla,” ta Chief Justice Thakur-i ashi.
Iba dak sentakba nung kasa senden nungsa Ato kilonser, Narendra Modi-i, item onüktem reprangtsü atema  sorkar ketdangsertem aser judiciary na nungi akumba committee ka tentettsü, ta shiogo.
“Chief Justice-i benokba tongtibang onüktem atema ni inyaktsü,” ta Modi-i ashi.