NATO-i Turkey nungitsü telemtetba agir

Brussels, July 28 (Agencies): Turkey-i tang tenzükba Syria aser Iraq na nung lendong kanga sashia atalokdaktsüba kiralongrar telok tetsüti, Islamic State (IS) telok anema raraba maparen nungitsü telemtetba ka North Atlantic Treaty Organization (NATO)-i tanü Mongolbar nü agiogo.
Turkey-i taoba hopta tatembanglen nungi tenzüka IS aser Kurdistan Workers Party (PKK) telungpur anema raratsü tenzükba sülen linük 27 züngsemba NATO senden ka Brussels yimti nung tekaraba mapang nung amentsü tajungshiba olen ka Turkey Tir, Tayyip Erdogan metetdakja liasü.
“Turkey-i tang ajurua aliba tensa tamajung azüoktsü maparen nung NATO-i Turkey den nungitsü renema lir,” ta NATO Secretary General, Jens Stoltenberg-i tanü senden ka amenba sülen metetdaktsü.
Ajisüaka, NATO-i par mitkar züngsemtem mesüra tayimtsütem yoka Turkey den yariteptsü telemtetbabo tang tashi agia mali.
“NATO nung züngsemba linük kati ajurushiba timtem ajunga agientsü asoshi NATO-i nungdakba maparen inyaktsü renema lir,” ta Stoltenberg-i ashi.
Ajisüaka, NATO temzüng kübok Arla 5 nung renemba ama, NATO nung züngsemba Turkey linük nem mitkar teyari agütsütsüsa Erdogan-i tanü tashi teyari memeshi lir.
“Ozü Turkey-i ozü linük kümzüka ayutsü nükjidong nung ozü linük nem lendong bener arutsürtem den tongpang raratsü tenzükogo aser ozü mitkartemi takok mangu tashi tongpangji raratsü renema lir. Ajisüaka, ozü linüki tarutsü mapang nung NATO nungi teyari nungdaka akümtsü akok anungji, NATO-i ozü linük yaritsü atema renemshia alitsü ajungshir,” ta Erdogan-ia tanü metetdaktsü.
NATO temzüng kübok Arla 4 nung NATO züngsem kati lendong tsüdong ajurudang külem NATO züngsemtem den nungdakba osangtsüsang agiteptsü lateta lir aser Turkey-i tan IS telok nungi lendong ajurutsü tenzükba yong temzüngi melaba ama inyakogo.
Taoba mapang, 2012 nunga Syria den mangatettep ken o adokba sülen Turkey-i ayonger külen, NATO senden anaben tashi amenba osang bushiteta lir.