Nigeria Tir tasenba, Buhari-i Cameroon semdangtsü

Lagos, July 28 (Agencies): Nigeria Tir tasenba, Muhammadu Buhari-i tan mezüngsüa, asüng, Bodbar nü Cameroon semdangtsü sentong renemba osang ka Tir office-i tanü sangdong ka ajanga metetdaktsüogo.
“Ozü linük ana tsüngda tesendaktep tajungba küma külemi lungjemer Boko Haram ta ajaba kiralongrar telok anema raratsü nükjidong nung ozü lenisang, Buhari-i tan Cameroon semdangtsü sentong renemogo,” ta Tir otongdar, Garba Shehu-i ashi.
Buhari-i Tir menden benoker mezüngbuba hopta nung kidangsüa aliba Niger aser Chad linük na semdanger hopta 8 shi süir külen, pai tan Cameroon semdangtsü sentong renemer lir.
Nigeria Islamist yimli kümdaktsütsü merangba Boko Haram telok anema rarabaren nung Nigeria mitkartem den yariteptsü asoshi Niger aser Chad nati par mitkartem Nigeria-i yokba osang bushiteta lir.
Cameroon-ia par mitkar züngsem meyirijang jenti yoka Boko Haram telok den Nigeria arrtsülen tongpang kanga sashia raraba osang bushitetogo.
Tesüiba mapang, 1980s nungi tenzüka arrtsü den sentakba mangatettep ken o adoka Nigeria o Cameroon na tsüngda tesendaktep mejungi aru saka tanübo par linük ana tsüngda tesendaktepji tajungba akümtsü tenzüka lir.