Tendulkar, Dhoni aser Azhar nunger taküm otsü indang film reprangtsü yongyar:Kholi

Mumbai, April 25, 2016 : India cricket team nung batsman tajungtiba rongnung ka, Virat Kohli-i, “Ni India cricket team nung nüngtugu asayartem, Sachin Tendulkar, Mohammad Azharuddin aser Mahendra Singh Dhoni nunger taküm otsü nung ajemdaker yangluba film reprangtsü yongyar. Joko item film tem memunui sayatsü,” ta Hombarnü ashi.

Batting mongin Tendulkar-i tawa pa taküm otsü indang film “Sachin: A Billion Dreams” social network nung tera lemsatepogo. Ano Emraan Hashmi-i “Azhar” film nung Azharuddin ama shilem agia lir. Actor Sushant Singh Rajput-i “M.S. Dhoni: The Untold Story” film nung Dhoni ama shilem agia lir.

“Ni item film ajak reprangtsü kanga yongyaseta atar. Item film ajak rongnung Tendulkar otsü reprangtsü teyongyaba, kechiba süra ni tanur asüdang nungi pa kanga sapua liasü,” ta Kholi-i ashi.

“Ni pa meteta aruba mapang nungi kanga sapu. Pa cricket asaya aruba mapang atalokbatem ajak iba film ajanga sayutsü. Ni iba film kanga reprangdangner,” ta Privyplex den lokteper Virat FanBox lapokba mapang Kohli-i ashi.

Arishi küm 27 tain, batsman Kohli ya tang ano kanga junga asayatetba mapang ka lir aser pai tawa asayaba World Twenty20 asayamong nunga ‘man of the tournament award’ ngua liasü. Iba den külemi tang tasayadak Indian Premier League (IPL) nunga tang tashi nung pai runs timtiba (367 runs) yangluteta lir.

“Ano anünga aliba Dhoni taküm otsü yabo khenyongi balaka asütsü kechiba süra pa cricket masayadang mapa tanga inyaka liasü. Tasembuba nung Azharuddin dak atalokbatema kanga reprangdangner,” ta paisa ashi.

“Film asem nung ya parnok dak atalokba ajak keta lir. Item film repranger asenok melenshitsü tatishitsü tajung angutsü. Anungji ni item film ajak reprangtsü jangraseter,” ta Royal Challengers Bangalore nung Captain-i ashi.