Anogo 3 tsüngda nung Aleppo nung 60 shi tepset: SOHR

Aleppo, April 25 (Agencies): Syria anüdoklentip tsütsülen, Aleppo yimti nung taoba anogo 3 tsüngda nung ishiba agi nisung 60 shi asüba osang bushitetogo ta nübur temeten asoshi nokdakba tongti telok, Syrian Observatory for Human Rights (SOHR)-i tanü, Hombar nü sangoktsüogo.

“Syria sorkar aser sorkar anemer na tsüngda tanaben tongpang raratsü tenzüka, Aleppo yimti nung pokshiba osettsütem tsükdaktsüba ajanga tai maketba nüburtem tepsettsü tenzükogo,” ta Britain nung tentetba SOHR tenteti metetdaktsü.

Sorkar mitkartemi par tayimtsü amshia pokshiba oset tsükdaktsüba aser sorkar anemertemia pokshitsü osettem kalokja lendong atalokdaktsüba ajanga taoba Hokolbar nü nungi tenzüka tanü tashi nung tila tanur 7 aser tetsür 10 densema, nisung 60 shi asüba osang bushitetogo.

Syria Tir, Bashar al-Assad-i aniba Syria sorkar aser sorkar anemer telok na tsüngda yimjung tezüngzüktep ka taküm February ita agi saka taoba hopta nungi tenzüka par yimjung tezüngzüktepjia raksatsüsa Syria sorkar aser sorkar anemer na tsünga tongpang tanaben raratsü tenzükogo.

United Nations (UN)-i ayonger Switzerland nung amenba Syria yimjung senden nung shilem agir Syria sorkar anemer teloktemia iba senden nung madentsü lemteta senden nungi ayazüka taoba hopta aluba osanga jangjaogo.

“Syria sorkar mitkar tayimtsütemi bomb tsükdakja amakba ajanga sorkar anemertemi agia aliba shilem nung nisung 45 asüba aser sorkar anemertemi pokshitsü tongpang oset kaloktsüba ajanga sorkari agia aliba yimti shilem nunga nisung 15 asüba osang tang tashi nung jangjaogo,” ta SOHR-i osang jangjashitsü.

Ano külen, sorkar anemertemi yimjung tezüngzüktep anema inyaka, Aleppo aser Damascus yimti na amakba osang ka Syria’er foreign ministry-i tezüluba nung United Nations Security Council (UNSC) nung taoba Honibar nü benokba osanga angazükogo.

Sorkar anemertemi par amakba maparen inyakba ajanga US aser Russia nati tongti shilem agia Syria sorkar aser sorkar anemer na tsüngda agiba yimjung tezüngzüktep raksatsütsüsa jenjang bener arutsüba olen ka ministry-i kasa tezüluba nung metetdakja liasü.

Ano külen, Syria sorkar anemertemi yimjung senden nung shilem agitsü memulungaka, küm 5 tejaklen nungi tenzüka, Syria nung adokba mangatettep ken o bentettsütsü alizüng ayuba olen ka Syria-i yokba UN’er special envoy, Staffan de Mistura-ia metetdaktsüogo.

Syria sorkar aser sorkar anemer na tsüngda tongpang raraba ajanga tanü tashi nung nisung 250,000 dak tema asüba osanga bushiteta lir.