37 Assam Rifles-i NSCN (KN) indang Detention Centre ka makdok

Dimapur, April 25 (TYO) : Dimapur kübok Nagarjan tesem nung NSCN (KN)-i ozüngi memelaba Detention Centre ka lapoka lir ta osang angazükba sülen April 17, 2016 nü 37 Assam Rifles-i Nagaland police nungi teshimtet nübo lia iba tesem amak.

Iba mapang NSCN (KN) züngsem ana apu aser tenaji Sergeant Major Toluto Chishi aser Lieutenant Kherito Yamchunger na ta jangjaogo, ta Assam Rifles sangdong ka nung metetdaktsü.

Iba Detention Centre nungi taitsü aliba kulikaket aika angu. Iba mapang April 16, 2016 nü NSCN (KN) züngsemtemi apuba lanur ka kümzük. Iba nisung indang temang tendanga reprangdang zübo aika keta liasü. April 16 ji NSCN (KN) telungpurtemi pa apuba sülen parnoki züka merenshiba zübotem lir ta iba nisung jagi ashi, ta AR sangdong nungsa shia lir.

Telungpur teloktemi local nisungtem apuba aser parnok ozüng alema sota ayuba inyakyimji Cease Fire Ground Rules (CFGRs) anema lir.

Detention Centre nungi kümzükba nisung den NSCN (KN) züngsem anaji Dimapur East Police Station ket nung agütsüogo.