Bobbi Kristina Brown asüba sülen shibai $20m rongsen lemzüktsü?

Los Angeles, July 28 (Agencies) : Bobbi Kristina Brown asüba sülen la indang rongsen shiba keti aotsü ta asüba tasüngdangba aruogo.
Arishi küm 22 tain Bobbi July 26, 2015 nü alima nungi pila ao. La tzü chikodak süchia orr lia anguba sülen anepaluyonga aru saka iba nungi shia maru.
Tetsü Whitney Houston 2012 küm asüba sülen Bobbi-i $20m (£12.8m) senmang lemzük.
Whitney Houston-i zülua yutsüba will nung Bobbi Kristina arishi küm 21 ajungba sülen $20m nungi mezüngbuba shilem 10% agütsütsü. Ibaji March 2014 nung Bobbi tasoba anogo sülen $2m shi lemzük.
Ano, iba sülen Bobbi arishi küm 25 ajungba sülen 15% aser tanüngbaji la arishi küm 30 ajungba sülen angutsü ta zülua lir.
Ajisüaka, January 31 nü Bobbi Kristina lar Roswell, Georgia kidang tzü chikodak süchia orr lia anguba sülen la indang senmang atema o jembitsü tenzük.
Bobbi mozüki nung anepaluba mapang obendanger kati la tebu Bobby Brown aser tetsü tanutsü Pat Houston na nem co-guardian inyaktsü temelaba agütsü.
Iba ya ajanga Bobby Brown aser Pat Houston nati Bobbi Kristina anepalutsü aser medical teyari agütsütsü temeten agütsü.
Ajisüaka, iba temelaba nung Bobbi Kristina indang rongsen indang kecha shia mali.
February 2015 nung New York Daily News ajanga Bobbi Kristina tetsü Cissy Houston aser tebu tanubo ana, Michael o Gary nungertemi lar estate senmang lemzüktsü ta metetdaktsü.
Mezüngbo Whitney Houston indang will nung Bobbi Kristina tebu Bobby tenüg enoka liasü saka 2007 nung tena balaba sülen pa tenüng agienadok.
Bobbi Kristina asü nungbo la tetong Nick Gordon-i la indang estate senmangtsü akok ta nisung kari ashir. Ajisüaka, January 2014 nü tena kibong aküm ta asüba kuliji Bobbi Kristina tebu Bobby Brown-i magizüker. Pai ashiba agi tena kiyimba indang kuli kecha mali.