State sorkari shi aser tekolok nung tangar memeneper nem temeten magütsür

Kohima, April 25 (TYO) : State sorkari persons with disabilities (PWDs) nem temeten magütsür ta Nagaland State Disability Forum (NSDF)-i tai tongloktsüogo.
“PWDs nem temeten agütsütsü aser shilem agidaktsütsü indang ozüngtem yanglua liaka aser okadakia mapang shia tetuyuba agüjaka, Nagaland sorkari PWDs hau ta melii senzüka yutsür” ta Kohima Press Club nung osangbener senden ka nung NSDF Advisor, Diethono Nakhro-i ashi.
Shi aser tekolok nung tangar memenepertem nem temeten magütsüba inyakyim NSDF-i magizüktsü. 2011 census ajanga Nagaland nung shi aser tekolok nung tangar memeneper nisung 29,631 lir, saka parnok rongnung nisung 1833-i dang Social Welfare Department nungi disability pension angur, ta NSDF Advisor-isa ashi.
Mapang shitak nung disability pension magütsür aser küm shia PWD ka nem sen 2,400 agütsüba nungi department ketdangsertemi office maintenance atema sen 100 agir, ta laisa ashi.
Nagaland state nung Inclusive Education mpa küma tenzüktsüla aser School Education Department kübok Inclusive Education for the Disabled at Secondary State (IEDSS) senotsü tim mesüi amshiba asoshi telangzüba agütsütsü, ta NSDF Advisor-isa metetdaktsü.
Nagaland nung State Commissioner for PWDs indang ka tentettsüla aser tetemjen nübo ka shimtsüla. Küm ishika tejaklen Dimapur nung District Disability Rehabilitation Centre ka lapok saka senotsü manguba ajanga taoba küm ana tashi iba Centre shibanga lir, ta laisa ashi.
State sorkari Dimapur Centre ji asentenshia lapokba den tanga district tem nunga Rehabilitation Centre lapoka aotsüla. Ano, PWD Act 1995 aser Supreme Court Order 2013 ajanga sorkar mapatem nung PWDs nem noklang nung shilem asem lemzüktsütsü shia lir saka iba inyakyim mebenshir, ta Diethono-isa metetdaktsü.
Tanü osangbener senden nung NSDF President Kezhaleto Zecho aser Secretary Ashe H. Kiba na den tangartem aden.