Spain chuba, King Felipe-i yimtenren ken o bentettsütsü meranger

Madrid, April 26 (Agencies): Spain nung tentetba yimtenren teloktem rong nung mangatettep adoka yimtenren tensa mejungi akümbaren bentetja kasaji tajungba kümdaktsütsü nükjidong nung Spain chuba, King Felipe-i yimtenren telok lenirtem den tan hopta tepiyong ajurutepa senden balala amentsü sentong renemba osang ka chuba’er ketdangsertemi tanü, Mongolbar nü sangoktsüogo.

Spain nung chubai lenisütsü menden tenüng agidang bena, par linük nung democracy yimsüsütsü yimya benshi aka, tan ama mangatettep adokba ken o bentettsütsü maparen nung par chubai tongti shilem agiba osang bushiteta lir.

King Felipe-i tongti yimtenren telok 15 nungi lenirtem den Zarzuel Palace kübok parliament nung ajurutepa senden amenba den külemi, regional jenjang nung tentetba yimtenren telok lenirtem dena ajurutepa senden amentsü sentong renema lir.

Yimtenren telok balala den ajurutepa senden amentsü mapatongji tan Hokolbar nü tembanga, King Felipe-i Spain Acting Prime Minister, Mariano Rajoy; Opposition Socialists (PSOE) lenisang, Pedro Sanchez aser Podemos telok lenisang, Pablo Iglesias nunger den tatembangsüa senden amentsü sentong renemogo.

Iba mapatongji tembangba sülen King Felipe-i Spain Ato Kilonser menden bendaktsütsü asoshi yimsüsür tenüng benoktsü sentonga renema lir.

Taoba March ita agiba national election sentong nung Rajoy-i aniba People’s Party (PP) yimtenren teloki parliament menden timba angu saka par telok kijai sorkar tasenba tentettsü tashibo mongutet.

Ano, PSOE telokia tanabuba jenjang angu saka par telokia Spain yimsüsütsü tashi benoktsüja jenjang mongutettsüa aküm.

Ano külen, par linük indang yimtenren tensa tajungba kümdaktsütsü nükjidong nung PP, PSOE aser Ciuadadanos teloktemi aroki lokteper sorkar tasen tentettsü asoshi Rajoy-i ayongzükba osanga jangjaogo.