Mi agi museum ka rongtok

New Delhi, April 26, 2016: Mongolbar anepdang mesangwadang New Delhi nung mi tulu ka adoka National Museum of Natural History rongtoker aliba noksa angur.

 New Delhi, April 26, 2016 : Mongulbar anepdang mi tesashi ka adoka Delhi Ficci auditorium atongtepa atuba takdang trok buba nung aliba ‘National Museum of Natural History’ takdang rongtok.

Ketdangsertemi ashiba agi, iba museum nung aliba zülubanglu aser oset ka tanga manüngi rongtok.

“Kanga dang tongtiba ‘documents’ aser osettsüsettem ajak rongrepogo. Iba mi ajanga takoksa bentsür aruba koba tashi ano masadang,” ta ketdangser kati ashi.

Environment Minister Prakash Javadekar-i iba tesem semdangba mapang, iba lendong nung akoksaba osang tejangja bendenang, ta tetuyuba agütsüogo.

“Iba museum ya Ficci ki nung liasü, onoki iba mi ajanga takoksa bentsür aruba kanga junga asadanger tanaben shilua agitettsü osettem anünga lira osangji metetdaktsütsü,” ta Javadekar-i New Delhi nung ashi.

Hokolbar anepdang 1.48 ako nung adokba mi tesashiji anepdang 6:00 ako tashi nungang remseptet. Iba mi ajanga Ficci auditorium nung tanga takdanga kar dena rongsemogo.

“Tangbo mi khenyongi mali küma remsepogo. Ajisüaka mesuem nungi mokozü adok manenba ajanga maneni mita atadar,” ta fire bridage ketdangser kati ashi.

Iba mi tulu remseptsü atema mi remsepba gari 35 tashi amshia liasü.

Iba mi ya koma sür adokar ano tang tashi nung mejangjateti lir.