Zunheboto DC, Temsu Longkumer, NCS den tepila sentong agi

Dimapur, April 26 (TYO) : April 26, 2016 nü Zunheboto DC, Conference Hall nung Deputy Commissioner, Temsu Longkumer den tepila sentong ka ayongzüka agi.
Sentong nung DC Temsu Longkumer-i o jembidang, pa ita 20 tashi Zunheboto nung inyakdang administrative officers, DEF, Paramilitary forces, GBs aser Civil Societies-i pa den yaritepba atema kanga pelaba metetdaktsü.
Temsu Longkumer ji tetemjen ketdangser ka lir aser pa ya ajemalu, ochishir aser bendanga agüja inyakba ketdangser ka lir, ta Additional SP, Zunheboto, Relo Aye-i tanü sentong nung jembidang ashi.
Indian Red Cross Society (IRCS) Vice President, Hokugha-ia o jembidang ashiba agi, DE menden toktsür aosangji meimchir atema aria bilemtsüba ketdangser ka lir aser pai nüngdakbapurtem yaribaji Zunheboto-i teti bilemtettsü.
Administrative Officers tenüng nung SDO(C), Shanavas, IAS-i o jembidang, DC Temsu Longkumer-i junior officer tem alenbanga meyui sademsadema mapa inyakdaktsüba atema pelaba ashi aser SDO(C), Atoizu, Phuleshe-i outpost officers tenüng nung jembidang DC-i outpost officers asoshi bilemtsüba atema pelaba metetdaktsü.
Sentong nung mendenji ADC, Zunheboto, Nungsangmenla Imchen liasü aser Office Superintendent, Phuheto Swu-i temoatsü meshia sarasadem.