TVS Racing-i 1 buba tetsür bike toktepa anishir anioksemer

Bengaluru, April 26 (Agencies): Indian National Rally championships nung toktepdaktsütsü nükjidong nung TVS Racing teloki mezüngbuba tetsür bike toktepa anishir, Shreya Sunder Iyer par telok nung anioksemogo.
“Motorsport ya tebur tetoktepertemi tongti shilem agiba tetoktepba ka lir ta aikati aibelena bilemer. Ajisüaka, iba tangatetbaji tai lir kechiyong tetsür aikati motorsport sabang nung takok ngua toktepba kuli jenti lir,” ta Shreya-i metetdaktsü.
“Motorsport nung tetsürtemi tongti shilem agitsü nungdaka lir,” ta shia, TVS Racing teloki motorsports nung toktepa shilem agitsü asoshi tetsürtem ajungmesoba atema pelaba olen ka lai metetdaktsü.
Arishi küm 24 tain Shreya-i la arishi küm 17 aliba mapang nungi tenzüka, Himalayas kübok Suru valley nung bike anishiba den külemi, South India nung agiba kilometer 2,000 shi talang bike anir tesem balala semdangtsü mapatonga anogo 6 nung tembanga jajaba osang bushiteta lir.
“Shreya TVS Racing telok nung densemba ajanga tetsürtemi motorsports nung shilem agitsü ajungmesotsü. Lokti shilem ajunga nungi motorsports nung shilem agidaktsütsü nükjidong nung nüburtem maneni ajungmesotsü alizüng yua lir,” ta TVS Racing Team nung lenisang, Arvind Pangaonkar-ia metetdaktsü.