US-i Ukraine sorkar tasenba nungitsü nangzüker: Nuland

Kiev, April 27 (Agencies): US-i Ukraine sorkar tasenba nungita yaritsü tenangzükba olen ka metetdaktsüogo.

“Ukraine-i sorkar tasen tenteta par linük nung nungdakba temelenshi aser terenlok agiba maparen nung ozü US-i sorkar tasenba nungita yaritsü nangzüker,” ta US’er European & Eurasian Affairs nung Assistant Secretary of State, Victoria Nuland-i sangoktsü.

Nuland-i Ukraine semdanga Ukraine’er Ato Kilonser tasenba, Volodymyr Groysman aser Ukraine parliament Chairman, Andriy Parubiy na den Kiev yimtiba nung ajurutepa senden amendang iba olenji yashi, Mongolbar nü metetdaktsü.

“Ukraine madak yimsü asütsü maongka tajung anguba atema ozü US yimsüsür aser nübur tenüng nung pelaba lemsateper. Sorkar tasenba kübok Ukraine-i terenlok tulu angutsü sarasademtsür,” ta lai shisem.

Ano külen, sorkar tasenbai par Ukraine nung nungdakba temelenshi agitsü aser par linüki ajurushia aliba yimtenren mangatettepbaren agientsü alizüng ayuba olen ka Groysman-ia lemsatepa liasü.

“US-i ozü Ukraine sorkar nungita yaritsü nangzükba atema kanga pelar. Ozü linüki temelenshi jenti agitsü nungdaka lir aser temelenshiji asangsang nung takok ngua agiba ajanga dang ozü linük nung terenlok alitsü,” ta pai shisem.

Ukraine Tir, Petro Poroshenko-i temulung alemsang, taoba Ukraine parliament speaker, Groysman-i vote timba ngua, Ukraine Ato Kilonser tasenba akümtsü maongka tan April ita tetenzüklen ngua liasü.