Abdul Kalam Hyderabad den tesendaktep balaka liasü

New Delhi, July 28, 2015: Air Force Station nung Tir, Wb. Pranab Mukherjee-i tesüiba linük Tir, asür, Dr. A.P.J. Abdul Kalam mangjak nung akümtsübu angutsüba noksa nung angur. 

Hyderabad, July 28 (Agencies): Tesüiba mapang India Tir, asür, APJ Abdul Kalam ya Hyderabad den tesentaktep balaka liasü. Pai Hyderabad nung India linük missile yangluba aser renlokdaktsüba nung anitetba den temang anepaluyim nung yaritsü asoshi maparen aika nung terenlok adokdakja liasü.
1983 nungi tenzüka küm 10 tashi Defence Research & Development Organisation (DRDO) nung director ka ama inyakdang pai Integrated Guided Missile Development Programme (IGMDP) tenzük aser iba nung pa chief executive liasü.
Pa lenisüba nung Defence Research Development Laboratory (DRDL) ajanga Agni (a long range missile with a nuclear option) dak alia Prithvi (a surface-to-surface missile), Trishul (a short-range surface-to-air missile), Akash (a medium range surface-to-air missile) aser Nag (an anti-tank missile) takok ngua yangluteta lapoka yutsü.
Iba takok ajanga India-a International club den yonger ka aküm.
The missile man, ta ajasang, Kalam-i Hyderabad nung defence laboratory tashi tait aika lapoktsü.
Pa kanga tongmelang nisung ka asüba ajanga DRDL aser tanga defence research laboratory tem nung pa mesüka kümner aika liasü.
Pa linük Tir kümer sülena pai defence laboratory tem semdanga yangji aliba scientists aser bushisüngdangertem den sensaksema liasü.
Tawa Kalam aser Cardiologist B. Soma Raju na senteper yimdak yimtsüng nung aliba mozü kidang inyakertem amshitsü atema ‘tablet PC’ ka yanglua lir.
Iba tablet ji ita trok lir külen amshi tenzüktsü.
Mozü kidang temang yariba mapang sen talang agi oset amshitettsü aser tanü asüng nüngdakba technology amshitettsü atema pai bendanga agüja inyaka liasü. Pa Tir menden nungi anisüngzüker külen sen talang agi temang anepalutsü lenmangtem asoshi amoka inyaktsü tenzük.
Tesüiba küm 15 tsüngda nung Kalam-i Hyderabad aiben semdangogo aser iba mapa state nung aliba kaketshirtem den teti sensaksema liasü.