Shisaluyimertemi pei dak aketba sempet bushir

Dimapur, April 27 (TYO) : Tanü tazünger ajak ya mapa inyaktsü azünger, anungji nisung shiai pei dak aketba tashi aser sempet meteta mapa inyak angazüktsü aser bushitsü indang shisalemsatepba sentong ka tang GCYM ( Generation Countdown Youth Ministry), Sovima, Dimapur nung kadagi.
Iba sentong ya Akhoya Shisaluyimertem Telongjem tenzüker küm 75 ajungba tenüng nung Dimapur Akhoya Fellowship teyari agia kaketshirtemi ayongzükba sentong ka lir.
Tanü Bodbar anepdang mezüng sentong nung ” Nü dak aketba tashi aser nai jangratema inyaktsüba mapa,” onük nung jembidang, shisalen teyur Dimapur nung IPS Probationer,Wt. Vrinda Shukla-i kaketshirtem dang taküm nung kodangsa shilem agitsüsa mapa kar arudir, itemji maongka ta bilema agizüktsüla ta metetdaktsü. Lokti nung shilem agitsü atema khuret kar nungloktsü dang kodanga ma ta mashitsüla aser ibaji maongka arur ta angatettsüla ta laisa ashi.
Taküm nung Tsüngrem metetbaji kanga tongtibang, iba jagi anogo shia mapang tatsükabo Tsüngrem dang sarasadema pei taküm bushitsü mapang angur aser idangji aseni asen taküm jenjang tajungba metetter. Kaketshir shiai pei takümji tangar nem manishidaktsütsüla saka peii kechi mapa inyaktsü jangrar iba mapaji inyaka jangratema alitsü merangtsüla ta laisa ashi.
Naga nunger kintem rongnung Aor ajungba indang ashidang, Ao kin ya mapa tajung ajak nung samanirtem lir, anungji ibaji lanurtemi senmang küma maneni amshia aotsüla ta laisa ayongzük.
” Taküm ya tatsüka dang aser kanga senti aser iba taküm yanglutsübaji nü dak dang tashi lir,” ta Shuklaisa lanurtem dang nenshia metetdaktsü. Iba mezüng sentong nung onirji Mon nung DFO Wb.Aochuba IFS liasü.
Kasa anogo nung, tanabuba sentong nung ‘ Civil Service & Entrepreneurship” onük nung Peren nung SDO(Civil), Wb. Shivam Vermai jembidang, Civil Service aser Entrepreneurship anaprongla ya alima tajungba küma inyaktsü asoshi hadir tajung kaka lir, anungji item ama koba mapa nung südir süaka pei jangraba mapa inyaka alima terenlok asoshi inyaktsü atema pei dak temulungtetba tulu alitsüla aser kechi mapa südir süaka nendaka inyaktsüla ta kaketshirtem ayongzüka metetdaktsü.
Tanü tensa kaketshir shiai pei meküta atalokba mapatem aser sorkari inyakba mapatem indang bilemdanga ajung-majung shisadangtsüla aser itemji angatettsü merangtsüla, ” ta Shivam-isa metetdaktsü. Iba sentong nung onirji Wb.Zülutemsü Longkumer liasü.
(Maneni tapak 8 nung…)