Syria: Mistura-i Obama o Putin na teyari meshir

Geneva, April 28 (Agencies): Syria nung mangatettep adokba teloktem rong nung yimjung tezüngzüktep agidaktsütsü maparen nung yariteptsü temepishiba olen ka United Nations (UN)’er Syria envoy, Staffan de Mistura-i tanü, Brehostibar nü metetdaktsüogo.
“West-i ayonger külen Syria Tir, Bashar al-Assad-i aniba Syria sorkar aser sorkar anemer telok na tsüngda taküm February ita agiba meraratsü tezüngzüktep raksatsüsa tang tensa ajurua lir,” ta shia, par teloktemi asangsang nung yimjung tezüngzüktep agia, Syria tensa tajungba kümdaktsütsü maparen nung yariteptsü olenji Mistura-i metetdakja liasü.
US aser Russia nati tongti shilem agiba ajanga Syria nung mangatettep adokba teloktemi meraratsü nangzüktep agi aser tarutsü nunga par linük anati tongti shilem agiba ajanga Syria yimjung tezüngzüktep asangsang nung agia tensa jungdaktsütsü teimla lir.
Küm 5 tejaklen nungi tenzüka  Syria nung adokba mangatettepbaren bentettsütsü nükjidong nung US Secretary of State, John Kerry aser Russia Foreign Secretary, Sergei Lavrov nati tongti shilem agia Syria nung meraratsü tezüngzüktep taküm February ita agidakja liasü.