Dr Abdul Kalam-i police ka dang ‘Kanga pelar’ ta ashi

Shillong, July 28 (Agencies) : Meghalaya nung pa laoa tango mesademdang taoba Tir APJ Abdul Kalam-i police ka dang “Kanga pelar” ta ashi.
Iba osang ya Dr. Kalam den yariteper Srijan Pal Singh-i Facebook nung metetdaktsü.
Parnok Guwahati nungi Shillong nung Indian Institute of Management-i aodang arishi küm 83 tain Kalam-i police ka noktaker aoba ngua kanga süoki ia bilemtsü.
Parnok telokji gari 6-7 ka nung mener Shillong-i ao aser Dr. Kalam aser Singh na gari tanabuba nung liasü. Tena amenba gari jakdang gypsy gari ka nung police asem liasü aser police ana külenlen amen aser ka prangpong amer noktaka liasü, ta Singh-i ashi.
Parnok ghonda ka shi aodang Dr. Kalam-i “Kechiba pa odang noktaker? Pa kanga anibelemtsü. Iba ya temerenshi ama lir. Parnok gari dang wireless ajanga pa menang ta osang yokang” ta ashi.
Idangji Singh-i Kalam dang security tajungba agütsütsü atema pa noktaktsü tetuyuba agüja alitsü akok ta shia mesüzüktsü merang, saka Kalam-i police sangji mendaktsütsü atema shipet ashi.
Kalam-i Singh dang asemben tashi police dang dak teka ayiplokja menang ta shidangang ta ashi. Parnoki radio messaging asütsü merang saka makok. Tatem nung Kalam-i Singh dang “Ni pa den ajurutepnür aser pelar ta shinür” ta ashi.
IIM building tonga aoba sülen Singh-i security pur dang asüngdangya orr gari nung noktaker aruba police sangji ajurua Kalam dangi anir aru.
Pa Kalam nunger aliba taktang telungi anir ai aser idakji Dr. Kalam-i pa den salem aser kanga pelar ta ashi.
“Na kanga belemer südi? Na langka achitsü asü? Kü mechi nung na talangka noktaktaktsüba atema tejashima” ta Kalam-i police sang dang ashi.
Idangji police jagi “Sir, na atemabo ghonda 6-a noktaktsü mulunga lir” ta langzü.
Iba sülen mapang tatsüka dang lir Dr. Kalam o tejembidak nung ali nung laoa tango sadem.
Iba tatalokba ya tongti police ketdangser katia tanü metetdaktsüogo.
“Taoba Tir-i Special Operation Team (SOT) personnel ka yashi nikongtsütsü Guwahati nungi Shillong tashi kanga dang jeretperana ngua tenüngsang agütsü” ta police ketdangseri ashi.
Iba police ya M Kharkrang lir aser pai ashiba agi Dr Kalam-i pa ajar ta pa dang ashidang mezüngbo pa kanga tsübua liasü.