Dwayne Bravo-i Bollywood nung shilem agitsü jangrar

New Delhi, April 28, 2016 : West Indies cricket asayar aser kentener Dwayne Bravo-i, “Bollywood nung shilem agitsüji ni atema tejangraba tulutiba lir,” ta ashi.
“Bollywood nung densema yangji shilem agitsüji kü tejangraba rongnung ka lir aser ni khenbosa ibaji atema merangdangtsü,” ta Bravo-i IANS dang e-mail interview ka ajanga ashi.
Internet nung kanga nüngtugu akümba “Champion” ken atensang Bravo-i pa sapurtem dang pei tejangraba angateta amangtsüla, ta lemsatep.
Cricketer asayasangi, “Bollywood nung inyaktsü atema tasüngdangba karbo aruogo,” ta ashi.
Aji oda süaka Bravo atema tang aser teti cricket sa ajak dang tama asütsü.
“Music ya ni tanur asüdang nungi jangra liasü aser ni iba tsütsüa takok nguogo,” ta Bravo-i shisem.
Hindi film industry nung naia shiba sapur ta asüngdangdang, pai, “Salman Khan, Shah Rukh Khan aser Deepika Padukone nunger sapur,” ta langzü.
Ni Hindi film repranger aser Hindi ojanga karbo jembiteter, ta pai ashi.
“Champion” ken nüngtugu akümba ngua naia koma bilemer, ta asüngdangdang Bravo-i, “Kanga pelar. Nüburtemi ‘Champion’ ken ya tarutsü atema ‘Gangnam’ asütsü ta ashir aser ni aolen ajak iba ken sapurtemi tsüngsangba ni angur,” ta langzü.