Asür Dr Kalam indang Twitter account mesamatsütsü lemteter

Kolkata, July 28 (Agencies): Taoba India Tir, A P J Abdul Kalam pila oaka, pa nem tetushi agüja pai amshiba Twitter account mesamdaktsütsü renemogo.
‘In memory of Dr Kalam’ ta tenüng melenshir külen, asür Dr Kalam indang Twitter account-ji maneni benshitsü telemtetba ka par medemertemi agiogo.
Kalam tembar, Srijan Pal Singh administrator ama tongti shilem agia, tan tenüng melenshiba Twitter account-ji amshia Kalam-i pa taküm alidang jembiba o tem lemsatepba den külemi, ‘Wings of Fire’, ‘India 2020’ aser ‘Ignited Minds’ nunger densema Kalam-i taküm alidang züluba kakettem ‘In memory of Dr Kalam’ account ajanga nüburtem den lemsateptsü renemogo.
Singh ya India nunger kaketzülur, o jembir, nübur temeten asoshi nokdaker aser shishilembar ka lir aser pai Kalam den külemi lungjemer züluba ‘Advantage India’ kaket taküm 2015 küm tatembanglen sayatsü renema lir.
Asür Kalam-i February, 2011 nungi tenzüka India-i tanü putu nung ajurushiba ken o den sentakba shisatsü tajung lemsatepba den külemi, tangar ajungmesotsü osangtema par Twitter account ajanga lemsatepba osang bushiteta lir.
Twitter microblogging site nung Kalam-i züluba aser lemsatepba osangtsüsangtem azünger nisung million 1.4 dak tema aliba osanga bushitetogo.