India nunger film producer ka Canada nung meteta kümogo

Ottawa, July 28 (Agencies): Canada nung asor India tsür film producer tasen kati lai tawa produce asüba film ka agi US sen million aika aaba ajanga Canada nungi tarutsü nung la kanga nüngtugu akümtsü, ta media ajanga metetdaktsü.
Komal Minhas-i produce asüba “Dream, Girl” film ajanga sen aika aatetba ajanga media tem kanga pelateper, ta Hombar nü Daily Herald News ajanga metetdaktsü.
Iba film atema Minhas-i US director aser co-producer Erin Bagwell den külemi lokteper inyaka liasü.
Lai, “Dream Girl film ajanga tashi temetertemi taruba generation nung lenir asütsü pur ajungmesoba nung yaritsü atema otsü ashir,” ta lemsatepa liasü.
Arishi küm 25 tain, Minhas ya Grande Prairie, Alberta, Canada nung India nungi oa alir tashi temeteter kibong ka nungi aso. La ya kaket shisatsü bushiba nung tekolok kanga tajung liasü.
Lai arishi küm 17 asüdang Ottawa Carleton University nung oa azüng. Iba university nung la journalism, political science aser human rights azüng. La arishi küm 23 ajungba tashi nung mapa ana nungibo aridoka liasü. Iba sülen la kija producer ka ama inyaktsü tenzük.