T. Ken 111 – Temeshi takümji tepela taküm

“Saka temeshipur lenmangji anepong sangwa ama lir, kobai anüngdang matong tashi tali, tali sangwar.” (A.Shin 4:18).
Temeshiba meteni asenoki Tsüngrem angutsü makok (Ibri 12:14). Pai asenok meimra Pai asenok temeshi kümdaktsütsü akok asü ? Takoktsü. Saka Satani teti asenok mulungjang nung ajungshir. Pai asenok dang Tsüngrem indang tiyazü aika ashir. Itemji asenok tatemzükba asür. Asen majungba ajak Satan dak tongloktsür. Iba indang asenoki kar shisadangdi.
1.    Temeshibaji jangratemtsü masü
Yisui tenem nung sayutsüngi dang, “Mulungsen merükmerüka alir temoatsü,” ta sangdong. Amplified Laishiba nung “temoatsüji” asadangtsü makokba tepela aser tanelaren azükaru ta ratettsür. Temeshiba takümji kija aliba taküm masü mesüra tepela mali azüngmeyaka aliba taküm masü, saka ochibai teti anishidaktsüba taküm aser Khristan mapa nung teti tamang katetta inyaka aliba taküm lir. Shisa takatiba tambur Solomoni ashir, “Saka temeshi pur lenmangji anepung sangwa ama alitsü, kobai anüngdang matong tashi tali, tali sangwar.” (A. Shin 4:18). “Yongjia temeshipuri pei lenmang metoktsür, aser shiba teka temerük lir tali tashi taitba akümtsü.” (Yob 17:9). “Shingai marishidang temenenpuri ajener, saka temeshipur molusongzü ama tasü tait.” (A. Shin 28:1). Kodang asenoki temeshiba meimdir aser ozüng raksaba sempadir Tsüngremi tepela totzü agi mezütsür (T. Ken 45:7). Aibelenji tepela tepseter mezüngbuba tsükchir lir. Temeshiba takümji aibelen maliba taküm lir. Temeshibaji asenok dak kotak aliba lir. Thomas Brooksi (1608-1680) ashi, “Tang nisunger Temeshibaji Pa tepela tulutiba lir, aser kotak nung nisunger temeshiba pa tabensa temeshi asütsü.”
2.    Temeshibaji taret lir
Andrian Rogersi yamai zülu, “Temeshibaji Khrista dangi aoba lenmang masü; Khristaji temeshiba lenmang lir!” Kodang iba ochibai junga mangatetter, temeshibaji khuret lir. Kodang asenoki kar temulungjang ajunga agi meimdir asenoki pa/la peladaktsütsü asoshi takok tashi merangtsü. Tenyar Yohani Khrista den küm 60 tema jajadang pai iba tepela metetta liasü. Iba tambur nisungi ya zülu, “Kechiyong asenoki Pa ozüngtem benshitsü, ya Tsüngrem temeim lir; aser Pa ozüngtem taret masü.” (1 Yn. 5:3). Shidakba nung temeshi takümji anisüngzük taküm lir. Laishiba “meshitettsüba” O mezüngbuba  amshiba Lipok 2:3 nung “anisüngzük” ta shia aliba o nungi agizüka amshi. Temeneni asenok talenba küboki anir aser alar kümdaktsür. Temenen nempanga ali tashi asenok Dawid ama mangyima alitsü. “Anüngdang aser aonung Ne teka kü madak taret lir.”  Saka nai kodang aji Tsüngrem tsüngdang nangzükdir, Pai tatok agütsütsü aser asenoki tepela agi ken tendaktsür! (T. Ken 32:4, 5, 11).
Pelatepang, nenok mulungsentsü temerük pur, tenüngsang agüjang, aser ken tenang. Lanur aser tain, aonung aser anüngdang, tepela nung, temeim nung!
(Edward H. Plumptre 1821-1891).