Uttarakhand nung anogo 88buba arem aronger

Dehradun, April 30 (Agencies): Tanü agi anogo 88buba Uttarakhand nung arem rongtokdar, aser tang tashi nung mi ajanga ali acre 3,000 nung arem arongba den nisung 8 rongsetogo, iba den külemi state nung yim 1500 tashi lendong tia nung lia iba mi remseptsü aser kümzükba maparen inyaktsü atema Centre-i National Disaster Response Force (NDRF) sepai company asem yoksemogo.
Brihostibarnü state Angh, KK Paul-i NDRF teyari meshia liasü aser iba mi remseptsü atema stae sepai 6000 lemzükja liasü.
2016 February ita tenzüklen nungi state nung tang tashi nung arem nung mi adokba tatalokba osang 922 metetdakja lir, aser tatalokba balala nung tetsür asem den tanur ka densema nisung pongu asüba osang lir.
Nainatal nung forest department ketdangser, Dr Tejaswini Patil-i, “Tang (onoki) arem mi anasai moteter, miji degree 800-1000 tashi lir. Tang mapang ya kiyimba mapang, ajisüaka onoki nüburtem dang fire-crackers mapoktsü aser mi adokba osettem mamshitsü tuyuogo. Mi tila ka ajanga takoksa jenti angutsü,” ta ashi.
Indian Space Research Organisation indang satellite map ajanga tang Uttarakhand nung arem 53 tashi nung mi adoka aliba sayur, iba den külemi Himachal Pradesh, Uttar Pradesh aser Jammu & Kashmir state tema kongshiogo.