Nagaland nung High Court atema kiojen mali

Dimapur,April 30 (TYO): Nagaland nung tang tashi High Court balaka lapoktsüsa kiojen yanglua maka, anungji tangbo Nagaland High Court melapoktettsü ta Centre nung Law & Justice minister, D.V.Sadananda Gowda-i metetdaktsü.
Pai iba o ya Lok Sabha nung ken  o lemtepba mapang yashi Hokolbar nü metetdaktsü dang,  pei state meyong mejeteta High court alitsü atema tamasa kiojen shitak akatsüla ta shia liasü.
Tang tashi Nagaland asoshibo high court balaka maka, anungji Gauhati High Court ya Assam, Nagaland, Mizoram aser Arunachal state-tem külem meyong okadak lir. Ajisüaka, Manipur, Meghalaya aser Tripura state-tembo 2013 küm pei pei state high court balaka lapoka tenzükogo.
Northeast nung state asem nung pei meyong high court balaka melapoktetbaji state sorkari nüngdak kiojen merenemtsütetba ajanga lir ta Gowda-isa metetdaktsü.
State shia nung pei pei meyong High court balala lapoktsü asoshi Jaswant Singh Commission aser Supreme court obendang nung ashiba ama, high court lapoktsübaji state sorkari teinyaktsü ajak inyaker külen dang lapoker. State sorkari kiojen atema aser inyaker nem sen agütsütsüla aser ano pei state dena aliba High court nung obendanger tongtiba nungi temelaba alitsüla.
Linük nung state balala nungi pei pei high court aser court benches balaka lapoktsü asoshi temepishiba ken o kanga arur saka tang tashibo teinyaktsü ajak inyaker lapoktsü langa aliba state nung melapokba state-bo kata mlai ta Union Law minister-isa ashi.
Tang tashi nung India nung state aser union territory 24 tashi nung high court lapoka lir. Tematiba obendangdakji Supreme court lir aser inyakyim nung aliba ama high court ajak Supreme court den angatettepa inyaker.
High court shia pei pei state aser Union territory meyong alinük tasazük lir, aser high court kübokji civil courts, family courts, criminal courts, aser district courts balala lir.
State shia pei pei meyong high court alitsübaji kanga nüngdaker aser iba jagi dang nübortem asoshi obendang shitak aser yakta agütsütettsü, saka Nagaland ama state nungbo tang tangbo melapoktettsü südi, kechiyong Nagaland-i kiojena meyanglutettsü aser inyakertem nema taa magütsütettsü.
Ajisüaka, Nagaland asoshi high court balaka maka tashi India temzüng Arla 371 (A) nung shia aliba ken o mapa küma mamshitettsü.