India aser New Zealand tesentaktep tashi itshitsü: Pranab

May 01, 2016 nü New Zealand yimtiba, Auckland nung New Zealand Ato kilonser, John Key-i India Tir, Pranab Mukherjee ajuruba noksa nung angur. Kasa noksa nung Minister of State for Agriculture & Farmers Welfare, Dr. Sanjeev Kumar Balyan aser ketdangsertema kar angur.

Auckland, May 01 (Agencies): India Tir, Pranab Mukherjee-i tang New Zealand linük semdanga lir, aser tanü pai twitter ajanga, “Asen nüburtem tajangzük angutsü atema tarutsü nunga linük ana tesentaktep tashi tali itshitsü,” ta ashi.
Tanü Mukherjee-i New Zealand yimtiba, Auckland nung War Memorial Museum semdanga pai ‘Hall of Memories of World War II’ nung naro tokja akhüm agütsü.
Tir Pranab-i Marshall Islands semdanga liasü, aser pai, “India aser Marshall Islands na tsüngda kasa tangatettep nung tesentaktep junga kaa arudar,” ta ashi.
Tir-isa Government House nung New Zealand Governor General, Sir Jerry Mateparae ajurua liasü.
Pranab Mukherjee-i tang New Zealand semdangba ya  parnok den shishilembaba, rongsenkettsüng aser yimtenren nung amalitepa inyaktsü nükjidong nung semdangba lir.
Tang New Zealand nung India nunger kaketshir 23,000 shi lir.