S.S. Khaplang den ajuruteptsü atema senden agi

Dimapur, July 27 (Agencies) : Myanmar nung aliba Naga nunger telungpur lennirtem den ajuruteptsü atema Hombarnü Dimapur nung Naga Hoho aser Eastern Nagaland People’s Organisation senden ka agiogo.
Yashi senden nung anogobo melemtet saka state sorkari parnok dang NSCN mendenbuba S.S. Khaplang den ajuruteptsü aser Centre den maneni ceasefire alitsü mepishitsü indang onük benoka lemsatep.
Ajisüaka, senden nung adenertemi Khaplang-i parnok den ajuruteptsü memulungtsü akok ta tarendakba lia jembi aser ano parnoki linük anaprong nungi security clearance meshitsüsa akümtsü.
Tan Nagaland Assembly senden nung Koridang MLA, Imkong L. Imchen-i NSCN (K)-i ceasefire agienba atema Centre dak tai tongloktsüogo.
Pai ashiba agi, küm 14 tashi NSCN (K) den ceasefire liyonga arudang kecha meinyak.
Tang Centre den olemtep tagidak NSCN (IM)-ia ceasefire agien nung pa maoksatsü, kechiyong Centre-i tenangzükba agibatem süoki ia mebilemer aser metsüngareta meinyaker, ta Imkong L Imchen-isa ashi.
Paisa Armed Forces (Special Powers) Act aitsü aser iba ozüng ya Nagaland nungi agientsüla ta takhangba agütsü.
Naga Hoho-ia Centre dang Armed Forces (Special Powers) Act agientsü atema takhangba agütsüogo.
Naga Hoho tir Chuba Ozukum-i ashiba agi, shiametetertem aliba lokti shingaia iba ozüng magizüktsü.
Naga Hoho-i Prime Minister Narendra Modi nem iba ozüng agientsü atema tezüluba ka nung takhangba agütsüogo aser nübortemi iba ozüng anema maneni noktaktsü, ta Chuba Ozukum-i ashi.