Moatsü tsüngrem mopung

Asenok Aortem asoshi taküm 2016 küm moatsü mapang aruba mopung yabo kenyongi balaka tsüngrem mopung tapu ka aruogo. Atangji, yimya agi moatsü mapang ya tsüngküm o mei mapang na bendangba mapang ka lir, anungji aiben moatsü mapang nungi tsüngluruwa tenzüker. Iba jagi khen khen dak alaka moatsü anepdang tsünglu arur aser tsüngsang majung tenjir. Ibajibo alima tsüngküm mongpu dak aketba temoatsü tsünglu amai dang züngshir. Ajisüaka, taküm küm May ka moatsü anepdang Ao lima tulubalenka nung yipru mopung tesashi aita kiojen raksaja asenok amokmerenba tsüngrem mopungji kolen nungi kechiba yok ta bilemdangtsü kanga nüngdaker. Atangji, alima asünungji anüa aputsü, tsünglua arutsü, menoknoka anoktsü aser yiprua aittsü saka item ajak madakji Tsüngrem ka lir aser Pai itemji yoker aser nokdanger. Iba Tsüngrem dak amangertemji asenok lir. Aji oda, Tsüngrem nem tenüngsang agütsütsüba aser Pa nungi temoatsü meshia amongtsüba moatsü anogo nungang tsüngrem mopung agi asenok merenshitsüsa mapang ka tenjibaji asenok asoshi tebilemdangtsü tuluka asütsü. Atangji, alima tsütsü bilemdangdi süra iba ama yipru mopung aitba mesüra tzümetsüng adokba ya alima nung süngdonglidong samadaktsüba agi tzü mopung melenshiba ajanga atalokba asütsü. Iba amaji alima tesem aika kanga tsüka akümba ajanga rüjep agi akümba tenem aser asetkong ajak yimsaa orr tzümetsünger aser ano tzüyim yipru tesashi tekongi adoka aondang itemji tsükdaktsüsa arem maliba agi kiojen dak indangindanga arur kongshir. Ajisüaka, Tsüngrem tsütsü bilemdangdi süra yipru mopung aitba aser menoknok anokba ajakji Tsüngrem ain adokba mesüka lir. Aji oda, tang ama yipru mopong tesashi aitdang sensaker mekokmeinertem meyong kiojen chireptsü aser menoknok anokba mapang takartem ki laotsü. Tang tashibo asenok tia ajung menoknok anokyonga kiojen laotsüsa manok aser yipru mopong tesashi aityonga nisung asüama aser yiruyipong lendong ajurutsüsa matalok. Ano, ibajiang tesüngmangtsüka lir. Yimtsüng paika nung to ki paikato chirepa laor, nisung shinga meyiruba taochiji ulura, iba taochiji kong nungi arur ta shisadangdi. Iba ama lendong atalokpet ataloker saka nisung yiruyipongtsüsa aser asütsüsabo mataloker ta asüba ya asenok kümdangdaktsütsü asoshi temulung meyiptsü atema ‘warning’ agütsüba  mapang amai reprangtetter. Aji oda, asenoki yangluba ki chirepa laoba agi asenok asütsüsa aliba purtemji asenok lir. Item alima lendong nungi kümzüka alitsü asoshi asenoki inyakba mapatem agi Tsüngrem peladaktsütsüla. Tsüngrem pelaba nungi asenok tashi angur. Ajisüaka, tanübo asenoki Tsüngrem peladaktsütsü atema inyakba mapa ajak ya Tenyartem mapang Anania aser Safira nati inyakba mapa mesüka lir. Asenok mulungjang ochimashi agi sünga lir saka tebang agibo temeshi amato jembir. Asenoki tamangbo amanger saka deobar nü aser election maliba mapang dang amanger. Asenoki Tsüngrem nem tenlabo agütsür saka tangar meyong rakzükba nungi agütsür. Asenoki Tsüngrem nüng sanga Moatsübo amonger saka asenok mulungjang Tsüngrem nungi talangka pilaa lir. Ashiko, item temenen mapatem nungi temulung meyipdaktsütsü asoshi Tsüngremi taochi keta yipru mopong aser menoknok yoker asütsüa akok. Atangji, yipru nunga Tsüngrem dena lir aser menoknok nunga Pa dena lir. Asenoki ibaji meteta Moatsü aser Moatsü masüba anogotem ajak nung Tsüngrem peladakja inyakra, yipru aser menoknok senzüba lenmangjia Pai agientsütsü. Item tangatetba nung asenok pelaba agi Tsüngrema peladaktsütsüsa Moatsü mongdi.