RMSA candidate temi lungkak ait; Dept.-i appointment order agütsütsü nangzük

Kohima nung School Education Directorate kima RMSA selected candidate-tem longkak aitba noksa nung angur. ( May 2, 2016.)

Kohima, May 02 (TYO): Küm ana tema sorkari parnok nem appointment letter magütsüba atema tejashi nung Hombarnü Nagaland Rashtriya Madhyamik Shiksha Abhiyan (RMSA) Phase 2 & 3 candidate temi Directorate of School Education kima lungkak ait.
Tan agi tanabenbuba RMSA Phase 2 & 3 candidate temi takhangba agüja lungkak aiter. April 8, 2016 nungi parnoki lungkak aittsü tenzük aser parnoki ashiba agi, December 14, 2013 nü RMSA kübok secondary tesayur 900 shimtsü atema sangdongba nung parnok tatidang agüja takok angu saka tanü tashi parnok nem appointment letter magütsür.
April 12 nü School Education & SCERT Minister, Yitachu-i April 30 tashi nung appointment orders agütsütsü ta tezüluba nung nangzükba sülen parnoki lungkak aitba sentong anena atatsü telemtetba agi, saka April 30 süia tashi appointment orders magütsüba atema tanü nungi parnoki lungkak aittsü tenzük.
Tanep Directorate of School Education kima nung lungkak aitertemi tezülubatem amer lungkak ait. Ajisüaka, Department ketdangser kari asüngnep nungi appointment orders agütsütsü ta tanü nangzükba agi asüng tashi lungkak aitba anena atatsü telemtetba agi, ta candidate temi ashi.
Sorkari asüng tashi appointment orders magütsüra, parnoki tesashiba nung lungkak aittsü ta RMSA Phase 2 & 3 candidate temisa metetdaktsüogo.