2008 küm samaba gari ka Kohima police-i angu

Dimapur, may 3 (TYO) : DEF Kohima nungi Anti-Vehicle theft squad (AVTS)-i Indigo Marina gari ka sota lir.
Indigo Marina (NL-07-3483) gari indang osang tejangja bushitepdang, Police Commissionerate Dimapur nungi angazükba agi, iba gariji May 2, 2008 aonung nisung asemi tashiyim agi rakzüka bener aoba liasü.
May 8, 2008 aonung 8:00 ako meta 6th aser 7th Mile NH-39, Dimapur tsüngda mejangjatetba nisung asemi prangpong agi tuter gariji rakzüka bener ao. Iba dak sendakba nung Diphupar P.S nung ken o ka benoka liasü, ta Sub-Divisional Police Officer (South) & PRO Kohima-i sangdong ka nung metetdaktsü.
Gari samaba atema September 3, 2008 anogo nung Chief Judicial Magistrate, Dimapur tsüngdang ken o ka benok. Iba mapang gari auyartem aser gari indang osang mongutet saka okadaki kuli kodang ngudir iba ken o meyipa angadangtsü ta oshidang agüja liasü, ta Kohima Police sangdong nungsa shia lir.
Indigo Marina gariji küm 8 sülen angu aser O.C Diphupar P.S Dimapur-i Kohima Police nem requisition shidi agütsüba nung ajemdaker gariji agütsüogo, ta sangdong nungsa metetdaktsü.
Iba gari samadang registration number ji NL-03/0530 liasü aser Kohima Police-i apudang NL-07-3483 melener liasü. Auyaba gari anguba nisung dang asüngdangya asüdang, pai 2006 küm gariji alia amshir ta ashi, saka 2008 küm Diphupar P.S Dimapur nung iba gari samaba indang FIR ka benoka lir, ta Sub-Divisional Police Officer (South) & PRO Kohima-i sangdong nung metetdaktsü.