Youth Association Marepkong-i ayongzüka Moatsü amung

Mokokchung, May 3 (TYO): Youth Association Marepkong-i ayongzüka Moatsümung sentong ka Marep Asaya Lenden nung mungogo. Iba sentong nung O. Imti Longkumer, Deputy Speaker, Nagaland Legislative Assembly tongti tesemdanger liasü.
Pai iba sentong nung jembidang, town ama ka nung pei sobaliba wazüka ayutsü asoshi Marepkong lanurtemi Moatsü benjong ayongzükba asoshi pelaba den sobaliba nung dang masü saka shisaliok, saisapong, terenlok maparen aser luyim ajak nung liromedema aotsü asoshi tayongzükba ka agütsü.
Paisa Congress MLA-tem T.R Zeliang den adenba kuli ashidang, Naga yimten tebilemtsü teti atema latettsü nükjidong yur ka küma lungjemogo, yamaji koba Naga solution dak sentakba nung August 3 “Frame Work Agreement” agiogo, ibaji pelaa agizüker aser iba ajanga teti atema Naga yimten telatetba bener arutsü imlar, ta paisa ashi.  “Nüburtemia Naga solution nungji shisatsü agüja nungittsüla”, ta paisa shisem.
Mapang talangka Nagaland sorkar ya sentsüh aika nung dang tembanga liasü, aji saka, T.R Zeliang lenisüba kübok küm ka tsüngda nung sentsüh crore aika ajema akümtsü imlar, ta Dy. Speaker-isa metetdaktsü.