Tekülem ajanga moatsüba mong Moatsü amonger

Mokokchung, May 04 (TYO): ” Akhidang asen tsürabur mapang Longterok nung poker Jungliyimti nung liasü. Iba putu tensa mapang ya tsüngrem aser nisung na külemi liasü. Iba mapang Senden rejusangertemi anir tashidak wara temenen aser keyi aridokba sülenang tetsübu melii alu taleni otet aser yimtak temoatsü aru, anungji iba ama külema amongba ajanga temoatsü jenti bener arutsü nung, iba benjongmong dang Moatsü ta aja aser iba benjong nung madenerbo temoatsü malir ta amanga aru,” ta Justice & Law department nung Administrative Officer, Wb.A. Chuba Ozükumi metetdaktsü.
Pai iba o ya yashi Mongolbar nü Longjang yimtak moatsümong sentong nung tongti tesemdanger o jembidang metetdaktsü.
“Akhidangbo moatsü ya yimtsüng shia anogo balala nung monga liasü saka ajak liromedema amongtsü atema 1944 küm December 27 nungi 29 tashi Ao Kaketshir Mongdang lokti senden Longjang nung amongdang Moatsümong ya May 1 nungi 6 tashi aser Tsüngremmong August 1 nungi 3 tashi amongtsü lemtet aser ibaji British sorkaria mulunga agizük. Iba nung jagi tenzüka Ao lima nung Moatsü ya tang amai mapang ka nung dang amonger,” ta paisa ashi.
Alemli Ahom chuba mapang Burma nungertemi Ahom lima makyonga arudang, Asom nungertem Ao lima nung Mongsenyimti aser Longjang lushi tashi atua jenoka aliba otsü A.Chuba Ozükümisa shia liasü.
Paisa ashiba agi, tanü ‘Nagaland’ ta amshiba tenüng ya 1888 küm December 30 nü Mongsenyimti nung British nunger nisan asongba mapang Mrs.Titterington-i Naga Hills melena jatsüba tenüng liasü.
Paisa Aor lanurtem rongnung kin kidong bentetbenteta kibalembutsü aser sobalibaa aotsü asoshi ajungshi.
“Asen oshi samadaktsüra asen kin samadoktsü, anungji nübur ajaki asen oshi wazüka ayutsü merangtsübaji nüngdaka kümogo,” ta Chuba Ozükümisa metetdaktsü.
Iba sentong nung Chuchuyimlang yimten, Dibuia yimten aser Khanimu yimten nungi yimsüsürtemi Moatsü ratet, tajungshi aser tepela o jembia liasü. Iba benjongmong nung sobaliba ken, yartsüngsang, ar atsütepba aser au tsüktepba shilemtem agiba ajanga benjong lungsodakja liasü.
Iba sentong nungsa anükapang nungi Wb.A.Apok Jamir, BDO aser Longjang Medemsanger Putu Menden nung mendenbuba Wb.Imti Aier natia tepela jembia liasü. Iba moatsümong sentong tenzüka sannüker Wb. Sentii sarasadema liasü.