ACAUT-i ali kibur nem sen agütsütsü akanger

Dimapur, May 04 (TYO): National Highways & Infrastructure Development Corporation Ltd (NHIDCL) purtemi Nagaland nung National Highways lenmang yanglutsü asoshi ali agütsüba atema ali kiburtem nem temenok sen magütsür, ta ACAUT teloki kanga mepelaba o ka metetdaktsüogo.
Ali kiburtemi state ajungtsü atema parnok li ajanga gari lenmang yanglutsü asoshi jenjang kanga dalang agi temelaba agütsü, saka küm ana tashi süiaka alimenok sen magütsür ta ACAUT telokisa ali kiburtem tenüng nung metetdaktsü.
Küm ana jakdang gari lenmang yanglutsü asoshi latetba jenjang apibo kanga langa agütsüogo aser iba sülen ano jenjang reprangshia kena mamen, ajisüaka tang Assam den medemdangra, asenok kanga akoksar ta angatetter ta paisa ashi.
Tang tashibo ali kiburtem nem ali melena agütsütsüba sen magütsüba dang nungi RTI ajanga temetetnüba kar meshiba dak alaka talila bushia maor. Ajisüaka, tang NHIDCL purtemi kecha hau ta melii inyakpeter akaba mapatem toktsüba ya Naga nunger mezüngmeshiba mapa ka lir, anungji yaktasa ali kiburtem nem ali menok sen ajak agütsütsüla ta ACAUT telokisa takangba ka agütsüogo.