Chuchuyimlang nung Moatsü benjong longsoa mungogo

Mokokchung, May 04 (TYO): Minister for RD & REPA, Wb. C.L John aser par külem medemertem densema Chuchuyimlang yimtak Anü Mai Amphitheatre nung Moatsü benjong kanga longsotepa mungogo.
Iba sentong nung Chuchuyimlang nunger den kishikinar yim, Changlangsu (Konyak yim), Mongsenyimti Arküm Club, Yangpi (Chang yim), Pongching (Phom yim) aser National Institute of E-Learning & Information Technology Chuchuyimlang nungi telok balalai akhi sobaliba kentenmenü aser tsürabur yimya nung yartsüngsang balala ajanga shilem agia sentong tali meraketdaktsü.
Iba sentong nung Wb. C.L John-i jembidang, akhi putubo benjong mapang ya yimertem tsüngda pei lu nungi züsentetbatem nungi pei akaba yari angati senpet agütsütep aser kati ka dang taitoktepba mapang tajung ka liasü. Aji saka, tanübo lenmang tailen dang teimba amunger, ta metetdaktsü.
Tanü asenok benjong mungtepba ya tangari züsenteta akaba alia bener arua benjongteper, anungji, sangküm yanü nungibo pei yim nungi kechi züsenteter, itemji chiajema amungtsü asoshi paisa tayongzükba ka agütsü.
Ao kini ENPO kin dang meimba aser talisa Konyak nunger dang mapa tajung aika inyaka tenük lapoktsüba asoshi CL John-isa pelaba metetdaktsü.
Chuchuyimlang yim nungi legislator ana tashi adoktetba ya Tsüngremer maongka tulu lir, anungji, iba temoatsüji tagi shia agitsü asoshi paisa shisema liasü.
Taoba mapangbo British nunger den nüchiso asoshi rara, saka tanübo Naga nunger telok onsara kümer adianu o adianu tsüngda dang rarateper, ta paisa sasaseta ashi.
British nungeri Naga nunger ya balaka ta züngshiba ama India nungeria Naga nunger otsüji balaka ta agizükogo. Iyongji ang India sorkaria Naga yimten tebilemtsü ya teti asoshi telatetba bener arutsüner aser Joint Legislative Forum-ia ajaki agizüktetba telatetba bener arura pei menden toktsütsü mulung lir, ta ashi.
Ajisüaka, Naga nunger telok onsara aser shisa majemer aser tip külen ano temapura obang mapur. Anungji, “yangi telungpur kisüng dak tai tongloktsütsüsa madoker”, ta paisa Naga yimten dak sentakba olen kar lemsatep.
Anungji, tang koba Naga yimten tebilemtsü dak sentakba nung yimjung kishi lapoka tejembidak lir, iba nungji “lokti (civil societies) ajak lungjemtsüla”, ta paisa tayongzükba ka agütsü. “Onok MLA roker (60) kisüngi dangbo kecha meinyaktettsü, anungji, shisatsü agüja nungitdaktsüner aser arogotemia iba asoshi maneni khuret bendaktsüner”, ta paisa temepishiba ka shisem.
Iba sentong nung tetushi tejaoker Tourism Parliamentary Secretary, C.Apok Jamir aser Irrigation & Fllod Control, Parliamentary Secretary, Jacob Zhimomi natia Moatsü salem den tayongzükba o tulu bener arua tesentepertem ayongzüka liasü.