China-i SCS nung mitkar terenemshitsü sentong agir

Beijing, May 05 (Agencies): China mitkartemi mangatettep adokba South China Sea (SCS), Indian Ocean anüdoklen aser West Pacific tzüyim shilemtem nung par terenemshitsü sentong agitsü tenzükogo.
Tanü nungi tenzüka agiba terenemshitsü sentong nung shilem agitsü nükjidong nung missile destroyer Hefei, missile frigate Sanya aser supply ship Honghu nunger densemba mitkar rong 3-i Hainan Province kübok Sanya naval port yashi toktsüba osang jangjaogo.
Ano, Lanzhou aser Guangzhou ta ajaba missile destroyer rong 2 aser missile frigate rong ka, Yulin-i tan agiba mitkar terenemshitsü sentong nung shilem agiba osang angazükogo.
Mitkar rongtem den külemi, helicopter tayimtsü 3 aser mitkar züngsemtemia iba sentong nung shilem agitsü tenzüka lir.
Mitkar züngsemtem, rongtem aser tayimtsütemji telok 3 küma lemsar SCS, East Indian Ocean aser West Pacific tzüyimtem nung par terenemshitsü sentong agitsü tenzükogo.
Mitkartem rong nung tongpang raratsü renemshia alitsü aser mitkar rong o tayimtsütem na tsüngda amalitep lidaktsütsü nükjidong nung tan terenemshitsü sentongji tenzük ta China’er tzüyim sepai lenirtemi metetdaktsü.
China-i SCS tzüyim shilem tuluba ka par meyong ta züngoka SCS kübok densemba tzüyim shilem nung asektong tenteta  par mitkar tesep tenteta lir saka SCS-ji par kija meyong masü ta shia, kidangsüa aliba Vietnam, Philippines, Malaysia aser Brunei linüktemi China anema ken o benoka lir.
Ano, China-i SCS tzüyim shilem nung asetkong tenteta par mitkar tesep tentetba maparena kidangsüa aliba linüktemi aitsütsü tenzüka lir.