Davutoglu-i Turkey Ato Kilonser menden toktsütsü sangdonger

Ankara, May 05 (Agencies): Turkey Ato Kilonser, Ahmet Davutoglu-i yimsüsütsü menden toktsütsü lemtetba osang ka tanü, Brehostibar nü sangoktsüogo.
Turkey indang yimsüsütsü tashi benokba Justice & Development Party (AKP) Executive Committee senden ka tanü Ankara nung amenba sülen Davutoglu-i par AKP yimtenren telok lenisang menden maneni abentsü asoshi taruba mongdang nung candidate ka ama metokteptsü lemtetba osang metetdaktsü aser ibaji ajanga pai Turkey Ato Kilonser menden toktsütsü lemtetba osang angazüker.
“Ni ozü yimtenren telok lenisütsü menden abendang tamakok anguba kecha mali aser lenisütsü menden abenba atema sasa bilemba kecha mali. Ajisüaka, ozü AKP telok mendenbuba tasen shimtsü mapang tongogo ta angateta ni AKP lenisütsü menden toktsütsü lemtet,” ta Davutoglu-i osang jangjashitsü.
Pai lenisütsü mendenji toktsüaka, Davutoglu-i par AKP yimsüsür ama tenzüktsü aser Turkey Tir, Recep Tayyip Erdogan den amaliteptsü tenangzükba olen ka metetdakja liasü.
Pai yimsüsütsü menden toktsütsü lemtetba osang sangokja aka, AKP teloki tan May ita 22 nü rongdak senden ka amenba sülen ang par telok mendenbuba tasen shima, Davutoglu melenzüktsü sentong renema lir.
Angazükba agi, Davutoglu-i tan May ita 2 nü US semdanga US Tir, Barack Obama aser Tatong Tir, Joseph Biden na den ajuruteptsü sentong renema liasü saka Tir Erdogan-i kasaji magizüki US semdangtsü sentongji agiendaktsü.
Erdogan o Davutoglu nati yashi, Bodbar nüa ajurutepa senden amen saka tena tsüngda adokba mangatettepbaren mebentetteti süidaktsüba osang angazükogo.
Turkey linüki European Union (EU) nung züngsemtsü aser refugee nisungtem aser Islamic State (IS) kiralongrartem den sentakba khuret tulu benokba mapang ka nung Davutoglu o Erdogan na tsüngda tang mangatettep tulu adoker lir.