Linük nung University taila 22 lir: Irani

New Delhi, May 05 (Agencies): Linük nung University taila 22 tashi lir aser item rongnung Uttar Pradesh nung 9 aser Delhi nung 5 lir, ta tanü sorkari Rajya Sabha nung metetdaktsü.
Human Resource Development (HRD) Minister, Smriti Irani-isa, kaketshirtem mashiokdaktsütsü atema Ministry-i Ministry of External Affairs dang taila University aser taila reju ajak bushitsü atema mepishitsü, ta metetdaksü.
“UGC osang nung apir, (linük nung) University taila 22 lir, aser itemji UGC-i University taila bushitetba nung densema lir. Linük tesem balala nung parnoki UGC Act, 1956 ozüngtem alema inyaker,” ta Irani-i ashi.
Uttar Pradesh aser Delhi na dak alia West Bengal nunga University taila ana aser Bihar, Karnataka, Kerala, Maharashtra, Tamil Nadu den Odisha state shia nung University taila kaka lir, ta lai ashi.
Centre-i item University tem anema kecha meinyaker ta aitsüba dak sentakba nung Minister-i, sorkari teinyaktsü inyakogo, kechiyong Centre-i state sorkar tem dang item University tem anema inyaktsü tuyuogo, ta ashi.
“Tzüzüng-ozüng ya state onük lir aser federal inyakyim nung aliba ama state temi dang inyaktettsü,” ta laisa ashi.
University tailatemi kaketshirtem mashiokdaktsütsü atema sorkari “KnowYourCollege” portal ka aser university aser colelge tem indang osang tejangja metettsü atema mobileApp ka tenzüktsüogo, ta laisa metetdaktsü.
“Iba den külemi kaketshirtem den indangindanga tongteprateptsü atema onoki merangdar, iba dak alia kaketshirtemi taila university tem jangjatsü atema ‘KnowYourCollege’ portal tenzükogo,” ta lai ashi.