Assam, Kolajan nung Revival ka takok ngua kaogo

Dimapur, May 05 (TYO): Tsüngremer sentong ka ajanga Assam Dhemaji District kübok Kolajan tesem nung April 29-May 1, 2016 anogo tashi Revival sentong tulu ka takok ngua kaogo, ta Yajang C nungi Wb. I Lanu Jamir-i sangdong ka ajanga mmetetdaktsü.
Iba asentenshi sentong ya Asür Mr & Mrs Takoliba (Asangma) Chirnur aser semchisemnur temi ketdangsüa katsüogo aser iba sentong ajanga yangji aliba nübur aser Arogopur jenti tanela aser shi nung temoatsü aser taneptsü ngua liasü, kechiyong parnok asoshi iba ama asentenshi sentong ya mapang talangka makai liasü, ta kasa sangdong nung shia lir.
Iba sentong nung Mr. Merang Jamir (Dimapur) aser Ms. Arenla B Asso.Pastor (Women) Alongtaki B/Arogo nati o jembi aser Counsellor temji Asangla Longchar (Alempang, Mkg) aser Anungla (CTN) na liasü. Iba den külemi oa aliba Arogopur  Mr & Mrs. Ravi Ali-i par kidang aienertem anendakja anepalua liasü.
Sentong nung o jembirtemi anir teyaritepertem ajak dang ketdangsür kinungertemi kangasa pelar aser tazünger ajaki oagi aliba Tsüngrem osang atema tzüraba nüburtem asoshia sarasademdaktsüner, ta I Lanu Jamir-isa lemsatep.