Phek Forest Dept.-i anü tashi agi atsükba milen lemtsü

Dimapur, May 5 (Agencies): Lipoküm kümzüka aser wazüka ayutsü nükjidong nung Phek Forest Division-i Kamaleah tesem nung yim pongu, Matikhru, Akhen, Kanjang, Mollen aser Reguri den Phokhungri kübok aliba Mokie yim dena yim trok nem anü tashi kija agi atsükba milen (Solar Lamp) lemtsü.
Meluri sub-division kübok Kamaleah tesem nung mitsüktsü süngdongtem (pine tree) wazüka ayuba arem tuluka lir aser yimtaklirtem ajak parnok taküm atema aser kidang mi o tesangwa atema iba arem dak metaloker alir.
Parnok mitsüktsü süng dak metaloker aliba ajema kümdaktsütsü atema Phek Forest Division-i anü tashi kija agi atsükba milen ya lemtsü.
Iba milen ya Mumbai  nung amenoka aliba NGO, Eco-Solutions nung coordinator Yatendra Agrawal-i lemtsü.
DFO Phek Rongsenlemla Imchen, IFS-i la anibelem mesasai, tsüngtong tonga arua iba milen parnok nem lemtsüba atema Kamaleah tesem nung Tir,  Village Council tem aser yim trok nung aliba nüburtemi kanga pelaba lemsatepogo.
Yatendra Agrawal-i anü tashi agi atsükba milen agütsüba atema parnoki pa danga pelaba metetdaktsü.
Iba sentong nung Kamaleah EAC, Kedale Sebu, Ranger S. Katiry, Dy Ranger Joshuory aser yim trok nüburtem dena liasü.
Phek DFO, Rongsenlemla-i, tang tashi nung iba milen ya yim ter nem lemtsüogo aser tasembenbuba nung Tizu tesem den ano yim ishika nung lemtsütsü tebilemba lir, ta metetdaktsü.