Vikheho lenisüba nung süngdong atem Yim 24 nung süngdong 17,000 temogo

Kohima, May 05 (TYO): Alima tzü mopung ajanga timtem bentsür aruba tebilemtsü ajema kümdaktsüba nung yariteptsü atema Zunheboto district kübok Pughoboto sub-division nung aliba yimtsüng 24 nung süngdong tapu balala 17,000 tashi temogo.
Area Development Project 2016-17 inyakyim kübok ‘Green Pughoboto project’ omen nung ajemdaker süngdong atemba sentong ya iba tesem MLA aser Minister for Roads & Bridges, Y Vikheho Swu den Sub-division ketdangsertemi anir Local   ayonga agi. Parnoki atemba süngdong rongnung Gold mohar, silver Oak, Nahor, Ashoka, Bottle brush aser ano tanga süngdonga kar densema liasü.
Pughoboto asayaba moapu anasa süngdong ka temtsüba mapang, Minister Swu-i, “Tsüngremi agütsüba sempet rongnung tajungtiba kaji alima lir, anungji süngdong tema alima kümzüka ayutsüji asen teinyaktsü asütsüla,” ta ashi.
Asenok anema lia aser rongsen aika liaka alima kümzüka meyutetra item rongsen nüngdak mali akümtsü, ta pai ashi.
“Tawa meimlaba mapang nung tzünglu aser rür tululu alua ki meyirjang aika den tsünüsempongtsü aika raksatsügo, aser ibaji tzü mopung melenshiba ajanga lir,” ta pai sasaba olen ka ashi.
Asenoki süngdong atsüngba anentsüla ta shia pai, “Nai süngdong ka tsüngtokra iba melena süngdong ter atemtsüla,” ta ayongzük.
Swu-i, ‘Green Pughoboto’ inyakyim ajanga süngdong atemba tajangzük aser temang anema aliyim ajungketer, ta ashi.
Pai, “Süngdongtemi oxygen, chiyungtsü, shirurutem atema talidak aser tzü o ali naprong sota ayuba nung yarir,” ta ashi.
Kasa sentong nung Pughoboto ADC, Avelu Ruho-i, tarurtem pela agizükdang tekong lu ayimba anentsü ayongzük. Sentong nung kaketshir lenir Kitoho aser tetsür tentet nungi Pivili Swu nungeria o jembi.
Iba sentong Pughoboto Adhoc town council vice chairman Viyikhu Q. Wotsa-i ketdangsüba kübok BCP Pastor, Rev. Akhato Achumi-i sarasademer tenzük.