Auyaba ken o nung AR Commandant ka puogo

New Delhi, May 05 (Agencies): Mizoram nung ozüng alema shibelenertem dang nungi hon auyaba atema tanü Aizawl nung Assam Rifles ketdangser ka densema sepai 8 puogo.
2015 küm December ita nung Aizawl nung amenoka aliba Assam Rifles 39th battalion nung Commandant, Jasjit Singh aser par sepaitemi Myanmar nungi ozüng alema hon shibelenertem dang nungi sen crore 14.5 jenjang hon tapak 50 pua liasü, ajisüaka hon ji treasury nung magütsü aser ozüng alema shibelenertemji chiok.
Mizoram Police-i ashiba agi, parnoki hon ji bushia liasü, ajisüaka 39 Assam Rifles unit kati honji apuba metet.
Iba dak sentakba nung April 21, 2016 nü ken o ka benok aser ibaji bushisüngdangtsü atema Special Investigation team ka tenteta liasü.
Police-i ashiba agi, 2015 küm December 14 aonung Colonel Singh-i par sepaitem dang Aizawl yimti tezülen hon shibelenbaji mita atatsü tuyua liasü.
Taküm April 21 nü gari anir ka tenüng agi, C Lalnunfela-i nisung kari pa len tom nung sot aser gear box nungi hon tapak 52 bener ao, parnokji Assam Rifles sepaitem asütsü südi, ta Aizawl police station nung FIR ka benokba sülen iba osang temai adoka liasü.
FIR nungji Lalnunfela-i, parnok jagi prangpong agi pa amokmerenba sülen gari asem nung ao, ajisüaka par medemertemi ajungshiba ajanga pai police nem iba osang metetdaktsütsü lemtet, ta shia lir.
Auyaba nung shilem agiba atema Assam Rifles sepai 8 jia pua lir, aser parnoki asüngdangyartem dang parnoki aibelenba nangzükogo.
Singh-i pa atema okatsür ajanga May 5 nü anticipatory bail meshi ajisüaka Aizawl District & Sessions Judge, Lucy-i ibaji magizük.